Саха сирин маастардарын муус оҥоһуктара Ямало-Ненецкайга бастаата

Роман Петров уонна Иван Румянцев Ямало-Ненецкай автономнай уокурукка ыытыллыбыт «Пуровское сияние» муус оҥоһуктар куонкурустарыгар тэҥнээхтэрин булбатылар. Эр дьон биэс күн устата «Калинов мост» үһүйээнинэн композицияны оҥордулар диэн СИА суруйар.

«Былина дьоруойдара тиэмэлээх куонкуруска «Калинов мост» үһүйээнтэн муус оҥоһукпутун көрдөрдүбүт. Манна Калинов күргэтин таһыгар дракон төбөлөөх ат үрдүгэр бухатыыры оҥордубут. Скульптурабыт хас биирдии дэтээлин кыһаллан оҥордубут. Ыраас муус аҕыйаҕа, улахан муустары бэйэ-бэйэлэригар сыһыарар уустуктары үөскэппитэ», — диэн маастардар кэпсииллэр.