Саха сирин суруналыыстарын ахсыс пресс-тура — Кыргызтааҥҥа

Саха сирин суруналыыстарын Сойууһун бэрэссэдээтэлин солбуйааччы Галина Бочкарева салайааччылаах Норуоттар икки ардыларынааҕы Саха сирин суруналыыстарын Сойууһун 65 сылыгар анаммыт VIII пресс-тур муус устар 27 күнүттэн айанын саҕалаата.

Өрөспүүбүлүкэ күнүнэн Кыргызтаан Өрөспүүбүлүкэтин Бишкек куоратын пааркатыгар М.К. Аммосов пааматынньыгар тиийэн сүгүрүйүүттэн саҕаланна, суруналыыстар сибэкки дьөрбөтүн уурдулар. Дойдубутуттан илдьибит кытыан, туос, этиҥ түспүт мааһынан аал уоту оттон, алаадьылаан айах тутан, Үөһээ Сырдык Айыыларга, сирдээҕи үтүө иччилэргэ алгыстаатым.

Ол кэннэ Галина Алексеевна Максим Кирович Киин баартыйа бастакы сэкиритээринэн үлэлии сылдьан, чаҕылхай суолу ииһи, саха норуотугар аптаныамыйалаах өрөспүүбүлүкэни төрүттээччилэртэн биирдэстэрэ буоларын эттэ.

Бу Кыргызтааҥҥа Максим Кирович Аммосов пааматынньыга устуоруйа биир умнуллубат туоһута буоларын ыйда. Суруналыыстар пааматынньыкка сибэкки дьөрбөтүн уурдулар. Тэрээһин сүгүрүйүү оһуохайынан түмүктэннэ. Пресс-тур суруналыыстара салгыы Иссык Куль уонна  Тянь-Шань хайаларын хайысхатынан айаннарын салҕыахтара.

Марта Николаева, Саха сирин суруналыыстарын Сойууһун чилиэнэ