Саха сирин үөрэнээччилэрэ Бүтүн Арассыыйатааҕы оҕо экологическай пуорумугар кыайдылар

Саха сириттэн «Эколучики» хамаанда Бүтүн Арассыыйатааҕы оҕо пуорумугар «Экологияҕа бастыҥ сыыппара быһаарыыта» анал аакка кыайыыны ситистэ.

Тэрээһин Челябинскай куоракка ыытылынна уонна Арассыыйа 51 эрэгийиэниттэн кыттааччылары түмтэ. «Оҕолор «Ирбэт тоҥҥо сыыппара десана» бырайыактарын билиһиннэрдилэр, ирбэт тоҥ, уу эбийиэктэрин уонна ойуур экоситиэмэлэрин туругун кэтээн көрөргө аныгы технологиялары туһаналларын кэпсээтилэр. Бу бырайыак билии уонна сыыппара үнүстүрүмүөннэрэ айылҕаны харыстыырга хайдах көмөлөһөр кыахтаахтарын көрдөрөр. Сахабыт сиригэр тулалыыр эйгэҕэ харыстабыллаахтык сыһыаннаһар, технологиялары эрэллээхтик туһанар уонна олоҕу тупсарарга дьулуһар көлүөнэ улаатан иһэр. Маладьыастар, Эколучиктар!» — диэн Ил Дархан Айсен Николаев ТГ-ханаалыгар суруйда.

Бүтүн Арассыыйатааҕы оҕо экологическай пуорума – дойду бары муннуктарыттан эдэр айылҕа көмүскээччилэрин түмэр киэҥ хабааннаах үөрэтэр тэрээһининэн буолар. Пуорум үһүс төгүлүн ыытыллар. Кыттааччылар бэйэлэрин экологическай көҕүлээһиннэрин билиһиннэрдилэр, айылҕаны харыстааһын суолталаах боппуруостарын дьүүллэстилэр уонна экологическай балаһыанньаны тупсарыыга бырайыактары көрдөрдүлэр.