Саха сириттэн сылдьар байыастарга УАЗ массыына тиийдэ

Анал байыаннай эпэрээссийэҕэ Саха сириттэн сылдьар байыастарга көмөлөһөн УАЗ массыынаны уонна эбии техническэй малы-салы тиксэрдилэр.

Массыынаны уонна анал тэриллэри өрөспүүбүлүкэ Донецкайдааҕы тирэх пуунун бэрэстэбиитэллэрэ тиксэрдилэр. «Донбаһы өйүүр Хотугулуу-Илиҥҥи пуондаҕа уонна Саха сирин олохтоохторугар улаханнык махтанабыт. Биһиги эһиги көмөҕүтүгэр эрэнэбит», – диэн «Плаха» диэн позывнойдаах байыас, биригээдэтин аатыттан махталын биллэрдэ.

Итини таһынан, бу күннэргэ тирэх пуун бэрэстэбиитэллэрэ Саха сириттэн сылдьар байыаннай сулууспалаахтарга дьонноруттан, аймахтарыттан аадырыстанан кэлбит, тус баһыылкаларын тиксэрбиттэрэ.

Санатан эттэххэ, «Саха сирэ эйигин кытары!» мобилизованнайдарга баһыылканы уонна көмөнү хомуйар пуун аадырыһа: Дьокуускай куорат, Орджоникидзе улууссата, 10. Өрөбүлэ суох, күн аайы 10:00 – 19:00 ч. диэри үлэлиир.