Саха тылын, литэрэтиирэтин, култууратын учууталларын ассоциациятын салайааччытын таллылар

Саха тылын, литэрэтиирэтин, култууратын учууталларын өрөспүүбүлүкэтээҕи “Сайдыы” ассоциациятын салайааччытынан Мэҥэ Хаҥалас улууһун Тумул орто оскуолатын учуутала Анастасия Дагданча талылынна.

Бу күннэргэ саха тылын, литэрэтиирэтин, култууратын учууталларын өрөспүүбүлүкэтээҕи сийиэһэ ыытылла турар. Жанна Барашкова салайааччылаах “Сайдыы” ассоциация ситиһиилээхтик үлэлээн кэллэ. Бүгүн түмсүү кылгас отчуоттуур-быыбардыыр мунньаҕа буолан ааста.

“Саха тылын, литэрэтиирэтин, култууратын  учууталлара ийэ тылбытыгар тапталы оҕолорго иҥэрэр, суолталаах учууталларбыт. Биһиги ээл-дээл үлэлиирбит хайдах да табыллыбат. Оҕолор саха тылын, сахалыы айымньылары саха тылын, литэрэтиирэтин эрэ уруогуттан билэллэр.

Саха тылын учууталлара баарбытын биллэрдибит, үөрэтэр-мэтэдиичэскэй үлэбит хаачыстыбатын тупсарыыны ситиһиилээхтик толоро сылдьабыт” – диэн бэлиэтээтэ. Итиэннэ бэйэтин баҕатынан салгыы салайааччытыттан тохтуурун, муоһаны эдэрдэргэ туттарар баҕалааҕын эттэ.

Мунньах кыттыылаахтарын биир санааларынан, Мэҥэ Хаҥалас улууһун Т.Г.Десяткин аатынан Тумул орто оскуолатын учуутала, 32 сыл оскуолаҕа үлэлиир уопуттаах Анастасия Гаврильевна Дагданча талылынна.

“Ийэ тылбыт сайдарыгар үлэлээн кэлбит үлэбит өссө сайдарыгар кыһалҕаларбытын бэйэбит туруорсубат түгэммитигэр, биһиги кыһалҕаларбытын ким да кэлэн быһаарыа суоҕа. Онон бары күүспүтүн холбоон, сомоҕолоһон, эппит санааларгытын салалтаҕа тириэрдиэҕим диэн эрэннэрэбин” — диэн Анастасия Гаврильевна эттэ.