Саха тылынан Брайль тиһигинэн оҥоһуллан тахсыбыт букубаар ХІІ Бүтүн Арассыыйатааҕы «Сыл бастыҥ профессиональнай кинигэтэ» куонкурус «Көрбөт уонна мөлтөхтүк көрөр дьон кинигэтэ» номинацияҕа иккис миэстэни ылла.
Бу туһунан балаҕан ыйын 6 күнүгэр бэйэтин ТГ-ханаалыгар Ил Дархан Айсен Николаев иһитиннэрдэ.
«Букубаар көрбөт уонна мөлтөхтүк көрөр оҕолорго көмөлөһүөҕэ, ааҕыы эйгэтигэр бастакы кинигэнэн буолуоҕа. Бу маны сыаналыыр олус уустук. Кинигэ Саха сирин анал (коррекционнай) оскуола- интэринээт-оскуола тииптээх тифлопедагогтарынан уонна, И.Н. Егоров-Горнай аатынан көрбөт уонна мөлтөхтүк көрөр дьон өрөспүүбүлүкэтээҕи анал бибибилэтиэкэ исписэлиистэринэн оҥоһулунна. Кинилэргэ улахан махталбын тиэрдэбин уонна ситиһиилээхтик куонкуруска кыттыбыккытынан эҕэрдэлиибин!» — диэн Айсен Николаев суруйар.
Санатан эттэххэ, сахалыы букубаардары коррекционнай оскуола үөрэнээччилэригэр бу үөрэх сылын саҥатыгар туттардылар. Кинигэ үһүс көлүөнэ федеральнай судаарыстыбаннай үөрэх ыстандаартынан оҥоһулунна. Үөрэх босуобуйатын Саха сирин коррекционнай оскуолаларга анаан начаалынай кылаас учуутала Анна Балбахова уонна саха тылын уонна култууратын учуутала Мария Ушницкая-Алехина уларытан биэрдилэр.
Сообщить об опечатке
Текст, который будет отправлен нашим редакторам: