«Сахафильм» саҥа дириэктэринэн Алексей Егоров ананна

Бэҕэһээ, бэс ыйын 1 күнүгэр, “Сахафильм” национальнай киинэ хампаанньаҕа саҥа салайааччы ананна.

Бу күнтэн ыла хампаанньа дириэктэрин эбээһинэһин толорооччунан Алексей Егоров – Өркөн буолар. Бу иннинэ Алексей Алексеевич “Лена” киинэ тыйаатыр дириэктэринэн үлэлии олорбута. “Салалтаҕа уларыйыы «Сахафильм» хампаанньа уонна “Лена” киинэ тыйаатыр биир тэрилтэҕэ холбоһууларын биир түһүмэҕэ буолар”, —  диэн СӨ култууратын миниистирэ Юрий Куприянов быһааран эттэ. «Сахафильм» хампаанньа билиҥҥи дириэктэригэр Сардаана Саввинаҕа, холбоһуктаах тэрилтэ генеральнай продюсерын дуоһунаһын сүгэригэр этии киирбит.