Сахамин Афанасьев: «Сүрүн баартыйа туһатыгар куоластаабыккыт иһин улахан махтал!»

“Биир ньыгыл Арассыыйа” баартыйа  Саха сиринээҕи салаатын сэкиритээрин 1-кы солбуйааччы Сахамин Афанасьев быйыл күһүҥҥү быһаарыылаах быыбар этэҥҥэ, оттон  “Биир ньыгыл Арассыыйа” баартыйа  кыайыыта эрэгийиэннээҕи баартыйа сөптөөх былааннаахтык үлэлээбитин үтүө түмүгэ буоларын туһунан санаатын үллэһиннэ.

— “Биир ньыгыл Арассыыйа” баартыйаны өйөөбүккүтүгэр Сахам сирин олохтоохторугар ис сүрэхпиттэн махтанабын. Быйыл биһиги өрөспүүбүлүкэбитигэр инникини түстүүр улахан быыбардар буолан аастылар. Үрдэппэккэ-дарбаппакка этэр буоллахха, сүрүн баартыйа олус көхтөөхтүк кытынна.  “Биир ньыгыл Арассыыйа” баартыйаттан турбут хандьыдааттар үксүлэрэ быыбардааччылар өйөбүллэрин, итэҕэллэрин ыллылар уонна кинилэр бар дьон, улуустардааҕы бэрэстэбиитэллэрдээх уорганнар интэриэстэрин Ил Түмэҥҥэ көмүскүөхтэрэ.

Биһиги бары Айсен Сергеевич Николаевы иккиһин Саха Өрөспүүбүлүкэтин Ил Дарханынан таллыбыт. Ол курдук, биһиги кини билиитигэр-көрүүтүгэр, уопутугар 100 бырыһыан эрэнэр этибит. Айсен Сергеевич бу иннинэ биэс сыл өрөспүүбүлүкэни үрдүк таһымнаахтык салайан барыбытын итэҕэппитэ улахан төһүү күүһүнэн, суолтанан буолла.

Биһиги Ил Дархан уонна сүрүн баартыйа быыбар иннинээҕи бырагыраамаларын соруктарын олоххо киллэрэргэ күүскэ ылсан үлэлиэхпит. Инники өттүгэр биһигини элбэх үлэ күүтэр, ону бары олоххо киллэриэхпит диэн эрэнэбин!