Саҥа дьыллааҕы харыйа саҥардыллыаҕа

Быйыл Саҥа дьылга урукку харыйа оннугар саҥаны туруоруохтара.

СИА-ҕа  техническэй эксплуатацияны хааччыйыы сулууспатын салайааччыта Дмитрий Семёнов иһитиннэрбитинэн, саҥа харыйа тиит курдук моһуоннаах буолуоҕа.

— Урукку сылларга харыйаны сэтинньи үһүс өрөбүлүгэр  туруорар этибит.  Быйыл Ленин болуоссатын өрөмүөнүнэн сибээстээн, ханна туруорарбытын сүбэлэһэ сылдьабыт. Бу нэдиэлэ бүтэһигэр киин куорат сүрүн болуоссатын харыйата туруохтаах сирин быһаарыахпыт. Бырабыытыластыба 2 №-дээх дьиэтин муннугар туруоруохха сөп диибит да, онно Ленин пааматынньыгын өрөмүөнэ ыытылла турар. Атын болуоссакка туруордахпытына, аны онно эппиэттээх киһини булуохха наада. Бу иннинэ кылаабынай болуоссат харыйатын анаан көрөр-истэр, умайбыт лаампалары уларытан биэрэр этибит. Быйылгы харыйа аттыгар миэстэ кырыымчыгыттан уот-күөс да туруута аҕыйах буолуоҕа, — диэн бэлиэтээтэ Дмитрий Семёнов.