Саҥа “щепкиннэр” “Грозаны” көрдөрдүлэр

Бу күннэргэ Щепкин аатынан Үрдүкү тыйаатыр училищетын түмүктээн кэлбит 6‑с саха устуудьуйатын артыыстара Саха тыйаатырыгар дипломнай үлэлэрин көрдөрдүлэр. “Сайыҥҥы түүҥҥэ түүл”, “Сакалаат саллаат”, “Гроза”, “Дон Жуан или Каменный пир”, “Улахан уол” туруоруулары аатырбыт “Щепкинтэн” тахсыбыт саҥа бөлөх Саха сирин көрөөччүтүн иннигэр оонньоото.

Эдэр артыыстары көрөөрү

2019 сыллаахха талыллан Москва куоракка үөрэнэ барбыт оҕолортон 20 киһи бу күннэргэ Саха тыйаатырын сыанатыгар артыыс быһыытынан сүрэхтэннэ. Маннык тэрээһин тыйаатыры таптааччыларга өрүү улахан интэриэһи тардар. Бу да сырыыга тыйаатыр саалатыгар биир да миэстэ ордубатах. Биир бэйэм нуучча тылынан оонньонор Николай Островскай “Гроза” испэктээгэр көрөөччү арыый аҕыйах буолаарай дии санаан эрдэттэн билиэт ылбакка тиийэммин, чуут мэлийэ сыстым. Каасса таһыгар билиэтин атыылыы турар киһиттэн ылан, испэктээги көрдүм. Сабыс-саҥа кэлбит, аат-суол оҥосто илик оҕолорго интэриэс улахана сөхтөрдө. Эдэр артыыстар инники кэскиллэрин билгэлээн эрдэхтэрэ. Бу эйгэҕэ уһулуччу ситиһиилэри идэҕэ дьоҕурунан эрэ ситиспэккин, дьоллоох түгэн, сөптөөх оруол элбэҕи быһаарар.

Нуучча тылынан туруоруу

Саха тылыттан атын тылынан туруоруу Саха тыйаатырыгар сэдэх көстүү. Николай Островскай “Гроза” пьесата нуучча тыйаатырын классиката. Щепкин аатынан устуудьуйа дьарыктанар Дьоҕус тыйаатырын норуокка (Государственный академический Малый театр) “Островскай дьиэтинэн” ааттыыллар. Онон эдэр артыыстар уһуйааччылара Людмила Титова бу испэктээги анаан-минээн туруорбут. Уһуйбут оҕолоро классика нөҥүө түөрт сыллаах үөрэхтэрин түмүгүн көрдөрдүлэр. Бу туруоруу бэлиэр устуоруйаҕа киирэр ситиһиилээх. Муус устар 12 күнүгэр, Островскай төрөөбүт күнүгэр, Костромаҕа, драматург мусуойа буолбут уһаайбатыгар бу бөлөх оонньоон көрдөрбүтэ. Саха артыыстара Арассыыйа улуу драматурун бастыҥ пьесатын төрөөбүт дьиэтигэр тиийэн оонньообуттара, кырдьык бэлиэ түгэн буоллаҕа!

Ол эрээри, үгүс сүрүн оруолларын сахалыы оонньуохтаах артыыстар нууччалыы туруорууга оонньообуттарын көрөн төһө дьоҕурдаахтарын сыаналыыр бэрт уустук сананыы эбит. Биллэн турар, артыыс маастарыстыбатын өттүгэр Саха тыйаатырын эдэр артыыстара бары үрдүк таһымнаахтара көстөр. Аҥаардас түөрт сыл устата дьаныардаах үөрэхтэн сыыйыллыбакка сыанаҕа тиийбиттэрэ — бу улахан ситиһии буолар.

Түмүктүүр буоллахха

Онон, “тус бэйэм астына көрдүм” диэн, кимиэхэ да сыҥалаабат сыана быһыытынан үллэстэбин. Бастатан туран, оруоллары үллэрии бэрт сатабыллаахтык барбыта көстөр. Кабаниха курдук ураты оруолу эдэркээн кыыс оонньуур эрээри (Айаана Егорова), олуона курдук көстүбэт, бэрт итэҕэтиилээх уобараһы оҥорон таһаарбыт. Сордоох-муҥнаах Катерина уустук оруолун толорооччу кыыс чахчы артыыс айдарыылаах оҕо оонньоото. Оруолу Нарыйа Шадрина уонна Алёна Пономарёва солбуһан оонньууллар эбит. Кулигин оруола бу туруорууга биллэрдик чорботуллубут, артыыс сорох түгэннэргэ сахалыы саҥаран ылар. Ол курдук, Ойуунускай хоһоонун дорҕоонноохтук ааҕар. Бу оруолу оонньообут Петр Домотовы кэнники сахалыы туруорууларга хайаан даҕаны кэтээн көрүөхтээхпин диэн билиэтэнним. Ордук итэҕэтиилээхтик, харах хатанар курдук оонньообут артыыһынан Варвара оруолун толорбут Айталыына Яковлеваны ааттыым. Эчи ыллыыра маанытын, туттара-хаптара сымсатын. Чэ, көстөн иһиэ, ким бу саҥа кэлбит бөлөхтөн саха көрөөччүтүн сүрэҕин сүүйэн, норуот таптыыр артыыһа буоларын.