Санаа быраас кинигэтэ

Куйаар ситиминэн «Санаа быраас» диэн илии баттааһыннаах тэттик суруйуулар кэлэр буолбуттара балай да кэм буолла. Ким барыта «бу хайалара эбитэй» диэн төбөтүн сынньара.

Биир үтүө күн мессенджергэ «бу быраас Мэҥэ Хаҥалас Тиэлигититтэн төрүттээх үһү» диэни булан аахтым. Ыйыталаһан билбитим — кини аата Назарова/Куприянова/Татьяна Михайловна диэн эбит! Буолаары буолан, оскуоланы биир сыл, 1967 сыллаахха бүтэрбит дьон буолан таҕыстыбыт. Дьэ онтон өйдөөн кэллим ол өрдөөҕү кэми: биһиэхэ, онус кылааска үөрэнэ сырыттахпытына, Хорообукка Майа орто оскуолатын онус «А» кылааһын оҕолоро шефтэһэ диэн ааттаан кэлэ сылдьыбыттарын. Ол оҕолор ортолоругар Таня Куприянова диэн ааттаах, бэрт сытыы-хотуу, саҥарбыт-иҥэрбит кыыс баара. Конферансьелаабыта, өссө көрүдьүөстээх кэпсээннэри кэпсээбитэ.

Татьяна Михайловна-Санаа быраас санаатын туймууларын күннүккэ тиһэн, бэртээхэй кинигэни таһаарбытын бу күннэргэ ааҕан бүтэрдим. “Күннүкпүн сэгэтэн көрдөххө”, бу саҥардыыҥҥыта тахсыбыт “буруолуу” сылдьар кинигэттэн киһи элбэххэ үөрэнэр, элбэҕи бэйэтигэр ылынар. Күннүгү ааҕан истэҕиҥ аайы ааптар хайдах дьиэ кэргэҥҥэ төрөөн-үөскээн, иитиллэн-такайыллан, кыратыттан үлэҕэ-хамнаска эриллэн, олох араас ыарахаттарын көрсөн, киһи быһыытынан ситэн-хотон, уһаарыллан тахсыбыта ырылыччы көстөр!

Аны турист быһыытынан аан дойдуну арҕарбыт киһи диэн кини буолар эбит! Кэргэнэ Семен Назаровтыын, оҕолорунуун, аймах-билэ дьонунуун сир шарын араас муннуктарынан элбэхтик айаннаан, араас омук дьонун кытта алтыһан, билиитэ-көрүүтэ кэҥээбит.

Түмүкпэр этиэм этэ: Т. М. Назарова-Санаа быраас кинигэтин ааҕыҥ, умсугуйуҥ! Мантан элбэҕи билиэххит, сүбэни-аманы ылыаххыт, олоххо тардыһыыгыт күүһүрүөҕэ!

Елена Прокопьева,

уопсастыбаннай кэрэспэдьиэн.