2005 сыл сэтинньи 25 күнэ саха норуотугар дьоһун суолталаммыта – бу күн ЮНЕСКО Олоҥхону «киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа» диэн аан дойду шедеврдэрин ахсааннарыгар киллэрбитэ. Бу улахан ситиһиибитин кэрэһилээн биһиги өрөспүүбүлүкэбитигэр Олоҥхо күнэ олохтоммута.
Өрөспүүбүлүкэтээҕи көрбөттөр анал бибилэтиэкэлэрин «Ааҕыы эйгэтэ» литэрэтииринэй түмсүүтэ сэтиннньи 23 күнүгэр, сэргэх сэһэннээх сэрэдэ күн, бэйэтин ааҕааччыларын олоҥхо тула түмтэ.
Дьоро күн дьоһун-мааны ыалдьыттарынан буоллулар: фольклорист, Муусука уонна фольклор түмэлин научнай үлэһитэ, М.Н. Жирков аатынан мусукаалынай кэллиэс үөрэтээччитэ, СӨ култууратын туйгуна Варвара Валерьевна Обоюкова, норуот талааннааҕа, оһуохайдьыт, «Дархан этээччи», тойуксут, олоҥхоһут Михаил Михайлович Евсеев-Куруһаай Мэхээлэ уонна олоҥхоһут, Олоҥхо тыйаатырын артыыһа, СӨ үтүөлээх артыыһа Валентин Гаврильевич Исаков.
Олоҥхо дьоро киэһэтэ саха олоҥхотун чинчийиигэ сүҥкэн кылааттаах артыыс, суруйааччы, РСФСР уонна Саха АССР норуодунай артыыһа, Былатыан Ойуунускай аатынан СӨ судаарыстыбаннай наҕараадатын лауреата Гавриил Гаврильевич Колесов төрөөбүтэ 90 үбүлүөйдээх сылыгар ананна.
Ол курдук, айылҕаттан ураты айдарыылаах, чаҕылхай талааннаах сүдү киһибит сахалыы ырыа-тойук, кылыһах, олоҥхо туһунан бүччүм санааларын сэһэргиир «Саха омук саарына Гавриил Колесов» диэн харахтарынан доруобуйаларыгар хааччахтаах дьоҥҥо анаан саҥа тахсыбыт кинигэни ааптар Варвара Обоюкова билиһиннэрдэ.
Былатыан Ойуунускай «Дьулуруйар Ньургун Боотур» олоҥхотун ыҥырыылаах ыалдьыттарбыт – Куруһаай Мэхээлэ, Валентин Исаков толорон, сэһэн-кэпсэл, ырыа-тойук кэһиилээх сэргэх киэһэбитин киэргэттилэр, оһуохайдаан сүргэбитин көтөхтүлэр.
Саха омук саарына Гавриил Колесов үйэлэртэн үйэлэргэ «Дьулуруйар Ньургун Боотур» олоҥхоҕо суруллубут тыыннаах куолаһа чугдаарарын тухары саха куттааҕы үөрэтиэ-такайыа, саха олоҥхотун сүппэт, симэлийбэт тыыннаан сайыннарыа, сөргүтүө!
Ульяна ЧИЧИГИНАРОВА, Өрөспүүбүлүкэтээҕи көрбөттөр анал бибилэтиэкэлэрин бибилэтиэкэрэ
Ахсынньы 7 күнүгэр Оһуокай куоракка олорор Бүлүү улууһун олохтоохторугар ананна. Куоракка олорор Бүлүү улууһуттан төрүттээх…
Дьүөгэм, Үп министерствотыгар таһаарыылаахтык үлэлээбит Анна Романовна Винокурова бочуоттаах сынньалаҥҥа олорор. Бу күннэргэ Дубайга олорор…
Аныгы сайдыылаах үйэбитигэр өрөспүүбүлүкэбит хайа да муннугар аны хаалыылаах, түҥкэтэх сир диэн суох. Бээ, бу…
Уһун, тымныы кыһыннаах, тыйыс айылҕалаах хоту дойдуга олорор буоланнар, өбүгэлэрбит барахсаттар күөх сайын уунар уйгутуттан…
Амма улууһун Соморсун нэһилиэгэр үлэһит тырахтарыыс уолаттар, эр дьон баар буоланнар, дэриэбинэ олоҕо күөстүү оргуйар.…
"Амма" эрэгийиэннээҕи айан суолун 93-94 км учаастагар билигин да күөлтэн уу киирэ турар. "СУ-77" тэрилтэ…