Сергей Иванов СӨ Ыччат бырабыыталыстыбатын бэрэссэдээтэлинэн талылынна

Сергей Иванов СӨ Ыччат бырабыыталыстыбатын V састаабын бэрэссэдээтэлинэн талылынна. Сэтинньи 25 күнүгэр бирикээскэ СӨ Бырабыыталыстыбатын бэрэссэдээтэлэ Кирилл Бычков илии баттаата, диэн иһитиннэрэр Ил Дархан, бырабыыталыстыба пресс-сулууспата.

“СӨ Ыччат Бырабыыталыстыбата саҥа түһүмэхтэн үлэтин саҕалыаҕа. Ыччакка сөптөөх усулуобуйаны оҥоруохпут, тупсарыахпыт, талааннаах оҕолору булан, арыйан, төрөөбүт Сахабыт сирин сайыннаралларыгар туһаайыахпыт. Хамаандаҕа көхтөөх, сатабыллаах, туохтан да туора турбат ыччаттар киирдилэр. Өрөспүүбүлүкэ салалтата туруорбут соруктарын быһаарарга бэлэммит», — диэн Сергей Иванов былаанын үллэһиннэ.

СӨ Ыччат бырабыыталыстыбатын саҥа V састаабыгар ылыы 2024 сыл балаҕан ыйын саҥатыгар саҕаламмыта. Үс түһүмэҕинэн барбыт куонкуруска хамыыһыйа чилиэннэрин иннигэр хандьыдааттар бэйэлэрин социальнай аахсыйаларын ыыппыттара, социальнай суолталаах бырайыактарын көмүскээбиттэрэ. Күрэхтэһии түмүгүнэн Ыччат бырабыыталыстыбатыгар 26 киһи киирбитэ.

Салгыы бэрэссэдээтэл дуоһунаһыгар киирсэр хандьыдааттар хамыыһыйаҕа Ыччат бырабыыталыстыбатын 2024-2027 сс. үлэлиэхтээх кэнсиэпсийэтин билиһиннэрбиттэрэ. Хамыыһыйа быһаарыытынан  бэрэссэдээтэл эбээһинэһин толорооччунан СӨ Ил Дархан уонна Бырабыыталыстыбатын дьаһалтатын Ил Дархан секретариатын ыстаарсай референэ Сергей  Иванов талылынна.