Сэрии толоонугар дьоруойдуу охтубут эһээ уонна хос-хос сиэн сырдык кэриэстэригэр

Балбахов Виссарион Дмитриевич,  үйэ чиэппэрэ кэм  устата Хоту сиргэ таһаҕаһы таһыыга эҥкилэ суох үлэлээбит Арассыыйа Федерациятын үлэ бэтэрээнэ. Саха Өрөспүүбүлүкэтин Уопсастыбаннай палаататын  чилиэнэ. 30 сыл устата “СаХабар” диэн Хабаровскай куоракка үрдүк үөрэх кыһаларыгар үөрэммит дьон түмсүүлэрин бэрэссэдээтэлэ.

Виссарион Дмитриевич  2015 сыллаахха, Улуу Кыайыы 75 сылыгар, Псков куоракка тиийэн  Аҕа дойду Улуу сэриитигэр  кыргыһыы хонуутугар сырдык тыына быстыбыт  абаҕата,  кыһыл армеец Егор Егорович Балбахов  (1919 с.т.) Псков куораттан 60-ча биэрэстэлээх Стремутки дэриэбинэҕэ  сэриигэ охтубут 5 тыһыынчаттан тахса  буойуннар Бырааттыы көмүллүүлэригэр  216 №-нэн харалла сытарын булбута.

— Буойун абаҕам кэриэһигэр, сырдык аатын үйэтитэн  2015 сыллаахха от ыйыгар  сөбүлүүр дьарыкпар – бильярдка күрэхтэһиини аан бастаан тэрийэн ыыппытым.  30-тан тахса киһи кыттыбыта. Томскай Михаил Семенович бастакы миэстэ, бэйэм иккис миэстэ буолбуппут. Онтон ыла  Аҕа дойду Улуу  сэриитин  кыттыылааҕа Е.Е.Балбахов кэриэһигэр  өрөспүүбүлүкэтээҕи бильярд күрэхтэһиитэ сылын аайы ыытыллан кэллэ.

Быйылгы VII өрөспүүбүлүкэтээҕи турнир уратытынан икки Балбахов:  Аҕа дойду Улуу сэриитигэр дойдутун, норуотун туһугар сырдык тыынын толук уурбут Е.Е.Балбахов уонна  мин бииргэ төрөөбүт быраатым Дмитрий Дмитриевич уола, сиэн быраатым, СВО-ҕа бастакы хомуурга ыҥырыллыбыт, дьоруойдуу охтубутун кэннэ Эр санаа уордьанынан наҕараадаламмыт  28 саастаах Айаал Балбахов  сырдык кэриэстэригэр ананна, —  турнир түсчүтэ  Виссарион Дмитриевич бу дьон болҕомтотун, араас күүстээх бильярдистар  интэриэстэрин тардыбыт тэрээһин туһунан билиһиннэрэр.

Турнир түөрт түһүмэҕинэн:  эр дьоҥҥо  бастакы

— 50 саастарыгар диэри, иккис – 50-тан 59-гар диэри, үһүс – 59-тан үөһээ саастаахтар диэн хайытыллан ыытылынна. Төрдүс түһүмэххэ дьахталлар күрэстэстилэр.

 Чахчы да эрийсиилээх, өй-мэйии сытыыланар, сыра-сылба баранар, ньиэрбэ-хаан тыҥааһыннаах күрэстэһии кыайыылаахтарынан  бастакы түһүмэххэ: Евгений Слепцов  (Орто Халыма) I миэстэ, Михаил Трифонов (Дьокуускай к.) II миэстэ,  Михаил Оконешников (Мэҥэ Хаҥалас), Андрей Софронов (Дьокуускай к.) III миэстэ  буоллулар.

 Иккис түһүмэххэ: Анатолий Козлов I,  Андрей Софронов II, Виктор Андреев, Владимир Третьяков III миэстэлэри үллэһиннилэр. (Бары Дьокуускайдар).

 Үһүс түһүмэххэ: Артур Иннокентьев (Өлөөн) I,  Дмитрий Максимов (Бүлүү) II,  Александр Макаров (Чурапчы), Иван Тарасов (Орто Халыма)  III миэстэлэннилэр.

 Төрдүс түһүмэххэ дьахталларга:  Мария Бельчусова I,  Екатерина Платонова  II, Гудея Андросова III миэстэ буоллулар, кыайыы үөрүүтүн биллилэр.

 Турнир  муҥутуур кыайыылааҕын аатын былдьаһыыга  иккис уонна үһүс түһүмэхтэр кыайыылаахтара  Анатолий Козлов уонна Артур Иннокентьев күрэстэстилэр.  Түмүгэр Артур Иннокентьев  “Супер-бириис” – Skat УГБ – 1000И  дьоҕус  электростанция хаһаайынынан буолла.

 Түһүмэхтэринэн кыайыылаахтар  иккилии бирииһинэн: “Makita”,   “STIHL”эрбиилэринэн, мотуордаах хотуурдарынан наҕараадаланнылар. Дьахталлар ортолоругар кыайыылаах “SINGER” иистэнэр массыынанан, иккис миэстэлэммит  “MAKITA” аккумуляторнай пылесоһунан наҕараадаланнылар.

Бу үлүгэрдээх сыаналаах бириистэри  бильярд успуордугар  өрөспүүбүлүкэтээҕи турниры тэрийээччи Балбаховтар халыҥ аймах бэйэлэрэ туруордулар. Бильярдистар турнирдарын олохтообут уонна  сыллата тэрийээччи Виссарион Дмитриевич Балбахов:

— Анал байыаннай эпэрээссийэ буола турар сиригэр  дьоруойдуу охтубут сиэн быраатым Айаал Балбахов  төрөппүттэригэр: ийэтигэр Елена Петровнаҕа, аҕатыгар Дмитрий Дмитриевичкэ  итиэннэ бииргэ төрөөбүт балтыларбар Наталья Дмитриевнаҕа, Людмила Дмитриевнаҕа, бэйэм дьиэ кэргэним чилиэннэригэр, Өлүөхүмэ улууһун Улахан Муҥку нэһилиэгин олохтоохторугар, баһылык  Еремей Иванович Решетниковка  барҕа махталбын тириэрдэбин,  инникитин да көмө-тирэх, өйөбүл буолуоххут диэн эрэнэбин.

Турнирга өрөспүүбүлүкэ араас муннуктарыттан  100-тэн тахса киһи кытынна.  Күрэстэһии  “Леман”,  “Триумф”,  “Амбар” бильярд  кулууптарынан ыытыллан.  Аҕа дойду  Улуу сэриитин уоттаах толоонугар  охтубут Егор Егорович Балбахов уонна кини хос-хос сиэнэ, СВО кыттыылааҕа, дьоруойдуу охтубутун кэннэ Эр санаа уордьанынан наҕараадаламмыт 28 саастаах Айаал Балбахов сырдык кэриэстэрин үйэтитиигэ анаммыт турниры ыытыыга өйөбүлүн иһин  Саха Өрөспүүбүлүкэтин Бильярд успуордун  федерациятыгар махталбын тириэрдэбин,— диир  2015 сылтан бу турниры көҕүлээн тэрийээччи,  үлэ бэтэрээнэ Виссарион Дмитриевич Балбахов.