Сэтинньи саҥатыгар көмө харчы барыта төлөнүөҕэ

Бу күннэргэ элбэх өҥөнү оҥорор кииннэргэ уонна «Госуслуги» порталга быстах байыаннай хомуурга барбыт дьон дьиэ кэргэттэригэр биир кэмнээх 200 тыһыынча солкуобай төлөбүрү оҥороллор.  

Үлэ сэтинньи 1 күнүгэр диэри түмүктэниэхтээх. Бу туһунан бүгүҥҥү брифиҥҥэ вице-премьер Ольга Балабкина иһитиннэрдэ.

— Саха сириттэр быстах хомуурга барбыт дьон дьиэ кэргэттэрин өйүүргэ туһуламмыт 200 тыһыынча солкуобай харчыны төлөөһүн бара турар. Бүгүҥҥү күҥҥэ байыаннай чаастарга баар Саха сириттэн тиийбит дьон туһунан чахчыны СӨ Үлэ уонна социальнай сайдыы министиэристибэтин исписэлиистэрэ чуолкайдаһан кэллилэр. Ил Дархан сорудаҕынан сэтинньи 1 күнүгэр диэри төлөбүр барыта оҥоһуллуоҕа.

200 тыһыынча солкуобай кээмэйдээх биир кэмнээх төлөбүрү уочарат быһыытынан: 1) кэргэнэ; 2) ыал буолуу туһунан докумуон суох  буоллаҕына, маннык өйөбүл бииргэ олорбуттара бигэргэннэҕинэ биирдэ көмө оҥоһуллар; 3) кэргэнэ суох буоллаҕына – байыаннай сулууспалааҕы кытта бииргэ олорбут сокуоннай сааһын сиппит оҕолоруттан биирдэстэригэр төлөнөр; 4) кэргэнэ уонна оҕото суох буоллаҕына – төрөппүттэригэр (эппэкииннэригэр) тэҥ өлүүлээн төлөнөр; 5) бу үөһээ ыйыллыбыт чугас аймахтара суох буоллаҕына – аҕыс-балыс, ини-бии аймахтаргыгар төлөнүллэр.

Сайабылыанньаны «Мин докумуоннарым» элбэх өҥөнү оҥорор кииҥҥэ биэриэххэ наада.

Ил Дархан Айсен Николаев ыйааҕар олоҕуран, байыаннай сулууспалаах дьиэ кэргэттэригэр 200 тыһыынча солкуобай харчынан көмөнү тэҥэ, уһуйааҥҥа  сылдьар оҕоҕо усунуос көрүллүбэт, 5–11-с кылаас оҕолоро оскуолаҕа босхо аһыыллар,  доруобуйаны тупсарар лааҕырдарга босхо путевканан туһаналлар, үрдүк уонна орто анал үөрэхтэргэ тус сыаллаах босхо үөрэх, устудьуоннарга үрдэтиллибит истипиэндьийэ көрүллэр. Байыаннай сулуупалаахтары өйүүргэ туһуламмыт миэрэлэр тустарынан сиһилии 122 төлөпүөҥҥэ эрийэн билсиҥ, — диэн быһаарда Ольга Балабкина.