Сэтинньигэ Саха сирин психологтара 1100-тэн тахса консультацияны ыыттылар

Саха сирин психологтара сэтинньи ыйга байыаннай дьайыы кыттыылаахтарыгар уонна кинилэр дьиэ кэргэттэригэр 1130 тус уонна бөлөҕүнэн үлэни ыыттылар. Консультациялар өрөспүүбүлүкэ иһигэр уонна атын эрэгийиэннэргэ баар госпиталларга тэриллэллэр.

«Ростов-на-Дону куорат байыаннай госпиталыгар биһиги кииммит психологтарын 35-с биригээдэтэ үлэтин саҕалаата. Санатан эттэххэ, биригээдэлэри биир ый болдьоххо ыытабыт, кинилэр бэйэ-бэйэлэрин солбуйан, үлэ быстыбат гына тэриллэр. Биһиги үлэһиттэрбитин ис сүрэхтэн кыһаллар, көмөлөһөр баҕаттан үлэлииллэригэр көҕүлүүбүт. Бу кураанах үлэ эрэ буолбатах, бу — киһи быһыытынан үрдүк сыаннастарга уонна көмөлөһөр идэлэр сиэрдээх-майгылаах өрүттэригэр олоҕурар», — диэн ахсынньы 5 күнүгэр ыытыллыбыт брифиҥҥэ Саха өрөспүүбүлүкэтээҕи психологическай киин дириэктэрэ Владимир Скрябин иһитиннэрдэ.

Кини госпитальтан тахсан баран психологическай көмөнү хайдах ылыахха сөбүн быһаарда: киһи бэйэтин баҕатынан кэлэр, киниэхэ табыгастаах күнү уонна кэми талаллар. Консультацияҕа бобуулаах, суолтата суох уонна сыыһа-халты диэн тиэмэ суох, ордук байыаннайга сыһыаннаах боппуруостарга.

Бары туһаайыылар анонимнайдар уонна кистэлэҥнэр, онон киһи бэйэтин аатын эппэккэ, атын аатынан суруттарыан сөп. Көмөнү уонна өйөбүлү ыларга бу нүөмэргэ эрийэн суруттарыахха сөп: 8 (4112) 31-91-09 (үлэ чааһыгар). Бу нүөмэринэн Киин улуустардааҕы филиалларын билсэр нүөмэрдэрин эмиэ билсиэххэ сөп. Ону таһынан, суукканы быһа үлэлиир итэҕэл төлөппүөнэ баар: 8-800-100-35-50 эбэтэр 122, онтон 6 уонна 2 сыыппаралары баттыахтааххыт.

Байыаннай дьайыы кыттыылаахтарыгар, кинилэр дьиэ кэргэттэригэр, ону тэҥэ атын ыксаллаах быһыыга-майгыга түбэспит дьоҥҥо өҥөлөр босхо оҥоһуллаллар. Бу үлэ хайысхата Саха сирин Ил Дархана Айсен Николаев сорудаҕынан, СӨ Бырабыыталыстыбатын бэрэссэдээтэлин солбуйааччы Ольга Балабкина тус хонтуруолунан ыытыллар.