Хаартыска: Сахагов.ру
Саха сиригэр олохтоох оҥорон таһаарыыны сайыннарар территорияларга быйыл сэттэ саҥа резидент киирэн, биирдиилээн урбаанньыттары уонна тэрилтэлэри киллэрэн туран, уопсай ахсааннара 18 буолла. Бу туһунан СӨ Экэниэмикэҕэ миниистирэ Петр Попов кэпсээтэ.
Резиденнэр ахсааннара эбиллэрэ олохтоох оҥорон таһаарыы хамсааһыннарын өйүүргэ тэриллибит территориялар ситимнэрин сайдыытын көрдөрөр.
«Бүгүҥҥү туругунан, олохтоох оҥорон таһаарыыны сайыннарар территорияларга 18 биирдиилээн урбаанньыттарга уонна тэрилтэлэргэ резидент статуһа бэриллибит. Сыллааҕы түмүктэринэн, резиденнэр инвестицияларын кээмэйэ 250 мөлүйүөн солкуобайга тэҥнэстэ, 30 саҥа үлэ миэстэтэ таҕыста. 2026 сылга Чурапчы улууһугар миэбэли, мас тутуулары, үүт бородууксуйатын, ону тэҥэ, турбазаны оҥорор бырайыактар үлэҕэ киирэллэрэ былааннанар. Нам улууһугар полуфабрикаты оҥорон таһаарар эбийиэк уонна Амма улууһугар пиломатериалы оҥорон таһаарыы эбийиэгэ былааннанар», — диэн тоһоҕолоото Петр Попов.
2025 сыл ахсынньы 1 күнүнээҕи туругунан, өрөспүүбүлүкэҕэ сэттэ олохтоох оҥорон таһаарыыны сайыннарар территория тэрилиннэ. Икки бастакы — Хаҥаласка «Эркээни хочото» уонна Горнайга «Горный» 2023 сыллаахха тэриллибиттэрэ. 2024 сыллаахха кинилэргэ Намҥа «Намский», Мииринэйгэ «Мирный», Чурапчыга «Уйгу Туоната», Аммаҕа «Амма кырдала», Мэҥэ Хаҥаласка «Сайын» эбиллибиттэрэ. Бу территорияларга уопсайа 3,3 млрд солк инвестиция уонна 579 үлэ миэстэтин таһаарыы былааннанар.
2025 сыл атырдьах ыйын 1 күнүнээҕи туругунан, 12 урбаанньыт резидент статуһунан эти уонна полуфабрикаттары, бэкээринэҕэ килиэби уонна кондитерскай бородууксуйаны, газобетоны оҥорон таһаарыыга, полипропилен пластик иһиттэри оҥорууга, туризм өҥөлөрүн сайыннарыыга, массыыналары көрүүгэ-истиигэ уонна да атын хайысхаларга бырайыактары олоххо киллэрэн саҕалаабыттар.
2024 сыл бүтүөр диэри резиденнэр бырайыактарга хапытаалынай инвестицияҕа 105 мөлүйүөнтэн тахса солкуобайы укпуттара, 10 үлэ миэстэтин таһаарбыттара. Кинилэр нолуокка чэпчэтиилэри ылыахтарын сөп. Маны тэҥэ, биэс сылга тырааныспар нолуогуттан эмиэ босхолоноллор.
Эбии өйөбүл миэрэлэрэ СӨ «О местных производственных территориях в Республике Саха (Якутия)» диэн сокуонунан көрүллэр, ол көмөтүнэн страховой усунуостары, кирэдьиит бырыһыанын ороскуотун, хапытаалынай инвестициялары сорҕотун толуйуу көҥүллэнэр. 2024 сыллаахха ахсынньыга ыытыллыбыт күрэхтэһиилээх талыы түмүгүнэн, резиденнэргэ 1,88 мөлүйүөн солкуобай төлөнөр.
Олохтоох салайыныы уорганнара резиденнэр бырайыактарын өйүүллэр, ол иһигэр сир регистрациятын уонна олохтоох нолуок чэпчэтиилэрин туһаныыга көмөлөһөллөр.
Санатан эттэххэ, Ил Дархан стратегическай ыйааҕар 2030 сылга диэри кырата 15 олохтоох оҥорон таһаарыыны сайыннарар территориялары тэрийэр сорук туруоруллар.
Сиһилии: https://www.sakha.gov.ru/news/16620
Ахсынньы 7 күнүгэр киин куоракка байыаннай дьайыы кыттыылаахтарыгар уонна бойобуой дьайыылар бэтэрээннэригэр аналлаах III физкултуурунай-спортивнай…
Дьокуускай куорат борокуратуурата сокуоннай сааһын ситэ илик оҕо ийэтин үҥсүүтүнэн бэрэбиэркэни ыытта. Бэрэбиэркэ түмүгүнэн, бу…
Бүгүн, ахсынньы 4 күнүгэр, Сунтаар улууһун Кириэстээх сэлиэнньэтигэр «Саргы түһүлгэтэ» култуура киинэ үөрүүлээх быһыыга-майгыга аһылынна.…
Нам улууһугар полиция үлэһиттэрэ ойоҕун быһаҕынан бааһырдыбыт, урут массыына уоран сууттаммыт 38 саастаах эр киһини…
СӨ Ыччат дьыалаларыгар уонна социальнай коммуникацияларга миниистирэ, байыаннай дьайыы кыттыылааҕа Петр Шамаев, Алдан улууһугар үлэтин…
-- Тоҕо хапытаалынай өрөмүөн усунуоһугар икки ыйдаах төлөбүр квитанцията кэллэ? Туһааннаах пуондаттан иһитиннэрбиттэринэн, бу дьыл…