Дьокуускайга байыаннай дьайыы уонна бойобуой дьайыылар бэтэрээннэригэр III турнир ыытыллыаҕа

Ахсынньы 7 күнүгэр киин куоракка байыаннай дьайыы кыттыылаахтарыгар уонна бойобуой дьайыылар бэтэрээннэригэр аналлаах III физкултуурунай-спортивнай тэрээһин буолуоҕа. Аҕа дойду Дьоруойдарын күнүгэр анаммыт күрэхтэһии «50 лет Победы» успуорт дыбарыаһыгар ыытыллыаҕа.

Тэрээһин ытык ыалдьытынан «Аҕа дойдуну көмүскээччилэр»  судаарыстыбаннай пуонда Успуорт, паралимпизм уонна култуурунай-сынньалаҥ үлэтин департаменын начаалынньыга Сергей Нестеров буолуоҕа. Турнир бырагыраамата киэҥ уонна кэрэхсэбиллээх- кыттааччылар буулдьанан, саха оҕунан ытыыга, спортивнай быһах быраҕыытыгар, остуол тенниһигэр күүстэрин холонуохтара.

Тэрээһин сүрүн киэргэлинэн олорон эрэ оонньонор волейболга көрдөрүүлээх реванш-матч буолуоҕа. «Биэдэмистибэ байыаннай дьайыы бэтэрээннэрин успуортка тардыыга улахан болҕомтотун уурар. Былырыын турнирга 80 киһи кыттыбыта, оттон быйыл 100-тэн тахса киһи үс категориянан күрэхтэһиэ диэн күүтэбит: инбэлииттээхтэр, инбэлииттээх диэн билиниллибэтэх бааһырыылаахтар уонна чэгиэн-чэбдик бэтэрээннэр», – диэн СӨ Физкултуураҕа уонна успуорка миниистирин бастакы солбуйааччы Гаврил Мохначевскай иһитиннэрдэ.

Успуорт – доруобуйаны чөлүгэр түһэриигэ биир саамай көдьүүстээх ньыманан билиниллэр. Гаврил Мохначевскай бэлиэтээбитинэн, Адаптивнай физкултуура уонна успуорт киинигэр, «Самородок» бассейҥа байыаннай дьайыы бэтэрээннэригэр успуордунан дьарыктанар алта көрүҥ баар. Ону таһынан, кинилэр министиэристибэ бары спортивнай эбийиэктэригэр босхо сылдьыахтарын сөп. Кыттааччылары бэлиэтээһин сарсыарда 09:00 чаастан саҕаланар, тэрээһин үөрүүлээх аһыллыыта – 11:00 чааска былааннанар. Көрөөччүлэргэ киирии босхо.