«Шаман» киинэ премьерата буолла

Тохсунньу 10 күнүгэр «Лена» киинэ тыйаатырыгар «Шаман» диэн Арассыыйа киинэтин премьерата буолла.

«Сахафильм» дириэктэрэ Алексей Егоров бары биир дьыалаҕа сулууспалаан, уруулуу норуоттар киинэлэрин сайыннара сылдьабыт диэн эттэ. Кэлбит ыалдьыттары билиһиннэрдэ.

— Быйылгы сылы үөрүүлээх сонунтан саҕалыыбыт. Хакасияҕа уһуллубут, биһиги итэҕэлбитигэр чугас тиэмэлээх киинэни тохсунньу 16 күнүттэн киэҥ экраҥҥа көрдөрөн саҕалыахпыт, — диэн кини эттэ.

«Шаман» киинэ премьератыгар режиссер Михаил Мерзликин, сүрүн оруолга оонньообут, Арассыыйаҕа биллэр артыыс Амаду Мамадаков кэлэн кыттыыны ыллылар.

— Мин Хакасияҕа аҕыйах нэһилиэнньэлээх Бея сэлиэнньэтиттэн төрүттээхпин. Христианскай иитиилээхпин эрээри, төрүттэрбэр ойууттар бааллар эбит. Онон этнографияны үөрэтэн саҕалаабытым.

Бу киинэ ойуун эрэ туһунан буолбатах, дьон сыһыанын туһунан, — диэн режиссер кэпсээтэ.

— Хакасияҕа элбэхтик сылдьабын. Туризм сайдан эрэр, саҥа кэм ойууннарабыт дэнээччилэр элбээтилэр. Бастаан документальнай киинэни устубуппут, онтон уус-уран киинэни устар санаа үөскээбитэ.

Саха сиригэр бу үһүс сырыым. Дьиҥнээх кыһыҥҥы хатан тымныыны астынан, дуоһуйан сылдьабын. Итэҕэлгэ, үгэстэргэ майгынныыр өрүттэрбит элбэхтэр, дьиэбитигэр сылдьар курдукпун, — диэн Амаду эттэ.

Бу киһини толкуйдатар, дириҥ ис хоһоонноох киинэ. Ойуун аналын, аныгы олох көстүүтэ буолбут, дьон мөкү, сидьиҥ кыдьыктарын туһунан элбэҕи толкуйдатар. Ойуун анала чэпчэки буолбатах.

Ааптар түһэриитэ.