Сир учаастактарын бары бас билээччилэрин абааһы тайаҕын утары охсуһарга эбээһинэстээтилэр

Сир учаастактарын көрүҥүттэн уонна категориятыттан тутулуга суох бары бас билээччилэри абааһы тайаҕын уонна эрэгийиэҥҥэ төрүт үүммэт атын биллибэт үүнээйилэри утары охсуһарга эбээһинэстээтилэр.

РФ Бэрэсидьиэнэ Владимир Путин илии баттаабыт сокуона 2026 сыл кулун тутар 1 күнүттэн күүһүгэр киириэҕэ. Билиҥҥэ диэри сыыс оту утары охсуһуу ирдэбилэ аҥаардас тыа хаһаайыстыбатын анаммыт сирдэригэр эрэ тарҕанара.

Ылыныллыбыт көннөрүүлэр ити итэҕэһи туоратарга ананаллар. Кэлэр сылтан сир учаастактарын бары бас билээччилэрэ абааһы тайаҕын уонна тулалыыр эйгэҕэ буортулаах атын туора үүнээйилэри эһэр эппиэтинэһи сүгүөхтэрэ.

Кутталлаах үүнээйилэр, биллибэт көрүҥнэр чопчу испииһэктэрэ эрэгийиэн таһымыгар оҥоһуллуохтара уонна субъектар нуормалыыр-быраап аахталарынан бигэргэниэхтэрэ. Итинник үүнээйилэри утары охсуһуу эппиэтинэһэ бас билээччилэртэн уонна куортамнааччылартан ураты, публичнай сервитуттары туһанааччыларга эмиэ сүктэриллэр. Ол курдук, бу суоллары, турбалары эбэтэр уот ситимнэрин тардар сыалга сир учаастактарын туһанар хампаанньаларга сыһыаннаах.

СҮБЭҺИТ: абааһы тайаҕа киһиэхэ туох кутталлааҕый?