Сокуоннай саастарын ситэ илик эдэр дьоҥҥо электроннай табаҕы атыылыыр бобуллуо

РФ Судаарыстыбаннай Дууматын көрүүтүгэр сокуоннай саастарын ситэ илик эдэр дьоҥҥо электроннай дэниллэр табахтары (вейптар) атыылыыры бобор туһунан сокуон бырайыага киирбитин туһунан Судаарыстыбаннай Дуума дьокутаата Галина Данчикова телеграм-ханаалыгар иһитиннэрдэ. 

Сокуон бырайыагын бары фракциялартан 398 дьокутаат өйүүрүн биллэрбит. Сокуон бырайыагар этиллэринэн, сокуоннай саастарын ситэ илик дьоҥҥо электроннай табаҕы, ону тэҥэ, ити табахтарга туһаныллар чаастары атыылыыр кытаанахтык бобуллар. Итилэр биирдиилээн атыылыыр маҕаһыыннарга эрэ атыыланыахтаахтар, атыыга аһаҕастык тахсыа суохтаахтар. Ол аата араас хабааннаах дьаарбаҥкаларга уонна интэриниэт ситиминэн атыыга таһаарыы кытанаахтык бобуллар.

Судаарыстыбаннай Дуума спикерэ Вячеслав Володин көҕүлээһининэн, ити ирдэбиллэр олоххо киирдэхтэринэ, нолуок сокуонугар уларытыылары киллэриигэ кэккэ этиилэр оҥоһуллуохтара. Ол курдук, табаҕы тардарга аналлаах тэриллэр көрүҥнэригэр акциз улаатыаҕа.

Тустаах сокуон бырайыага профильнай кэмитиэттэргэ тиэрдилиннэ уонна парламентарийдар суһаллык көрүөхтэрэ.