Спиридоновтар «Итэҕэл, эрэл, таптал» кэнсиэртэрэ көрөөччүнү уйадытта

Бэҕэһээ, сэтинньи 21 күнүгэр, Өксөкүлээх Өлөксөй аатынан Норуоттар доҕордоһууларын дьиэтигэр СӨ үтүөлээх артыыстара Мария уонна Василий Спиридоновтар «Итэҕэл, эрэл, таптал» диэн кэнсиэртэригэр олус элбэх киһи кэлэн артыыстары улаханнык долгутта.

Кэнсиэр иннинэ көрөөччүлэр фойеҕа сунтаардар уонна абыйдар оһуохайдарыгар кыттыһан, сүргэлэрэ көтөҕүлүннэ. Онтон кэнсиэр хотугулуу үҥкүүнэн тэтимнээхтик саҕаланаатын кытта көрөөччүлэри барыларын абыйдар уолларыгар ыыппыт тоҥ балыктарынаан күндүлээтилэр.
«Итэҕэл, эрэл, таптал» кэнсиэр бастакы чааһыгар Спиридоновтар аан бастаан айбыт ырыаларыттан саҕалаан, көрөөччүлэр сөбүлээн истэр уонна тэҥҥэ ыллаһар ырыаларын толорон, ааспыт кэрэ кэмнэри санатан ыллылар.

Бары билэрбит курдук, Василий Спиридонов -– байыаннай дьайыы кыттыылааҕа, «Боотур» этэрээт байыаһа. Онон кэнсиэр байыаннай тиэмэҕэ анаммыт иккис чааһын «Саха» Национальнай көрдөрөр-иһитиннэрэр хампаанньа биир бастыҥ ыытааччыта Роман Алексеев-Амор ыытта.
Василий Спиридонов «Боотурдардыын» биир өлүүгэ сылдьыбыт байыаннай доҕотторун сыанаҕа ыҥыран таһаартаата. Саха байыастара, ол иһигэр кэрэ аҥаар, бары сыанаҕа тахсан доҕордорун үбүлүөйдээх сааһынан эҕэрдэлээтилэр, киниэхэ тустаах наҕараадалары уонна мэтээллэри туттардылар. Василий байыаннай дьайыы, Ийэ дойдуга таптал, төрөөбүт дойдуга ахтылҕан туһунан ырыаларын толорон көрөөччүлэри улаханнык долгутта. Бу тухары экраҥҥа байыаннай дьайыыга аналлаах хаартыскалартан олус сатабыллаахтык таҥыллан оҥоһуллубут видеолар көрдөрүллэ турдулар. Онон бүгүн кэнсиэркэ кэлбит көрөөччүлэр  таптыыр ырыаһыттара Василий Спиридоновынан  уонна саха байыас уолаттарынан сирэйдээн, байыаннай дьайыы каадырдарын көрөн уйадыйдылар. Кылгас кэм иһигэр, этэргэ дылы, дойду билиҥҥи байыаннай устуоруйата барыта хабыллан көрдөрүлүннэ. Ону сэргэ патриоттуу тыыннаах, өрө күүрүүлээх үҥкүүлэр бу тиэмэни ситэрэн-хоторон биэрдилэр. Манна даҕатан эттэххэ, Василий байыаннай тиэмэҕэ айбыт ырыалара үксэ Спиридоновтар биир дойдулаахтара, СӨ Суруйааччыларын сойууһун чилиэнэ Зинаида Федотова-Дьол Кыымын тылларыгар суруллубуттар. Дьол Кыыма бу киэһэ үрдүк сыанаҕа тахсан эҕэрдэлээбититтэн уонна байыаннай таҥастаах доҕотторун уоттааах-төлөннөөх тылларыттан, чахчыта да. Кыайыы кыыма ыһыахтанан ылбытын курдук буолла. Кыайыы үөрүүтүн маннык бырааһынньыктыахпыт диэн барыбытыгар эрэл кыыма саҕылынна.

Ыытааччы Амор Василий Степанович  байыаннай дьайыыга ыксаллаах түгэннэртэн биир эмэ түгэни кэпсии түһэригэр көрдөстө. Саха хорсун байыаһа: «Итэҕэллээх, эрэллээх, тапталлаах, туох эрэ ыра санаалаах буоллаххына, Кыайыыга дьулууруҥ күүһүрэр. Чахчы ыксаллаах түбэлтэлэргэ түбэһэн сылдьыбытым», -– диэн биир түбэлтэни бар дьонугар кэпсээтэ.

Көрөөччүнү улаханнык долгуппут, уйадыппыт кэнсиэр режиссера, Сунтаардааҕы оҕо ускуустубатын оскуолатын дириэктэрэ Алексей Степанов 55 сааһын туолбут Василий Спиридоновы үйэлээх таптал тыыннаах холобурун, дьоһуннааах ыал аҕатын, патриот быһыытынан уонна эр дьон сомоҕолоһуутун, доҕорго бэриниилээх буолууну, ыал ийэтэ, оҕолоро алаһа дьиэ аҕатыгар уйан тапталларын киэҥник хабан көрдөрдө, итэҕэтиилээхтик арыйда.

Ол курдук, бүгүн итэҕэли, эрэли, тапталы сэргэ дьиҥнээх махтал киэһэтэ буолла. СӨ Ил Дарханын уонна бырабыыталыстыбатын дьаһалтатын салайааччы Георгий Михайлов Василий Спиридоновка СӨ бырабыыталыстыбатын Махтал суругун, СӨ култуураҕа уонна духуобунай сайдыыга миниистирин солбуйааччы Мария Силина «СӨ култууратын бочуоттаах үлэһитэ» бэлиэни, СӨ Мелодистарын сойууһун бэрэссэдээтэлэ Николай Андросов Махтал суругу уо.д.а. бэлиэлэри туттардылар. Үгүс элбэх доҕотторо, Сунтаартан уонна Абыйтан биир дойдулаахтара, Сунтаар улууһун баһылыгын бастакы солбуйааччы Мирослав Иванов, Бордоҥ сэлиэнньэтин баһылыга Константин Уаров, Абый улууһун Кэбэргэнэ сэлиэнньэтин баһылыга Иван Атласов уо.д.а. истиҥ эҕэрдэлэрин тириэрдэн, Василий олоҕун аргыһа Мария Спиридоноваҕа туспа истиҥ-иһирэх тылларын анаатылар, сибэкки дьөрбөтүн эгэлгэтин туттардылар.

СӨ Судаарыстыбаннай Мунньаҕын (Ил Түмэн) дьокутаата Афанасий  Постников 20 сыл дойдутугар сылдьыбатах Василий Спиридонов кэргэниниин Абыйга барар ороскуоттарын уйунарын туһунан этиитин көрөөччүлэр дохсун ытыс тыаһынан махталларын биллэрдилэр.

Махталлаах көрөөччүлэр: «Күн кирийэн тахсыыта көстүбэт үрдүктэн көмүскэллээх буолуҥ, Аар айыыларгыт алдьархайдаах адьынаттары антах үтэйдиннэр», -– диэн алҕаан, таптал, Ийэ дойду туһунн ырыалар өссө да айылла туралларыгар баҕара хааллылар.