«Спортивнай» түөлбэҕэ успуорт саалатын тутуута сыл бүтүүтэ түмүктэниэ

Дьокуускайга «Спортивнай» түөлбэҕэ сыл бүтүөр диэри элбэх өҥөнү оҥорор успуорт саалатын тутуута түмүктэниэ.

«2021 сылтан ыла биһиги куораппытыгар тутуллар төрдүс оҕо-эдэр ыччат успуорт оскуолата буолар. Бүгүҥҥү туругунан манна дьиэ каркаһын, модульнай хочуолунай тутуутун үлэтэ түмүктэннэ, сылааһы киллэриигэ бэлэмнэнэллэр. Ону таһынан, успуорт инвентарын атыылаһыыта бара турар, Дьокуускайга аҕалыыта күүтүллэр. Бу күүтүүлээх эбийиэги сыл бүтүөр диэри тутан бүтэрэн үлэҕэ киллэрэр былааннаахпыт. Бэлиэтээн эттэххэ, 5 сыл иһигэр 3 саҥа оскуола, 3 оскуола успуорт саалатын тутуутун, баар эбийиэктэри өрөмүөннээһин түмүгэр, биһиги успуордунан дьарыктанар оҕо ахсаанын 4,7 тыһыынчаттан 8 тыһыынча кэриҥэ иитиллээччигэ диэри улаатыннардыбыт. Элбэх өҥөнү оҥорор успуорт саалатын үлэҕэ киирдэҕинэ, успуордунан хабыы 9 тыһыынча кэриҥэ оҕоҕо тиийиэҕэ», – диэн Дьокуускай куорат баһылыга Евгений Григорьев бэйэтин ТГ-ханаалыгар иһитиннэрдэ.

Дьокуускай 2-с уонна 17-с кыбаарталларыгар саҥа «Спортивнай» түөлбэни тэрийэр сыалтан 160 саахалланар туруктаах элбэх кыбартыыралаах мас дьиэни көтүрүөхтээхтэр. Ааспыт сылга 11 икки этээстээх дьиэ олохтоохторун көһөрбүттэрэ. Сыл бүтүөр диэри Дьокуускайга Якутскай, Космонавтар уонна Пионерскай уулуссалар икки ардыларыгар сытар 2Б кыбаарталлартан өссө 17 саахалланар туруктаах дьиэни көһөрүөхтэрэ. Олохтоохторго «Звезднай» кыбаарталга кыбартыыра эбэтэр харчынан төлөбүр бэриллиэҕэ. Ол баҕаларынан ханнык баҕарар атын дьиэни атыылаһар кыаҕы биэриэҕэ.