Бэс ыйын 11 күнүгэр Турцияҕа олорор сахалар Стамбул куоракка үгэскэ кубулуйбут ыһыахтарын ыыттылар.
Ыһыах Стамбул куорат “Нилюфер” пааркатыгар ыытылынна. Манна 2017 сыллаахха Турцияҕа Дьокуускай куорат күннэрин чэрчитинэн саха сэргэтэ турбута. Сэргэни оҥорууга маастардар Александр Павлов, Александр Шадрин үлэлээбиттэрэ. Тэрээһиҥҥэ оччолорго Дьокуускай куорат баһылыга Айсен Николаев, Саха сирин бастакы бэрэсидьиэнэ Михаил Николаев, Стамбул куоракка Арассыыйа оччотооҕу посола Алексей Подъелышев кыттыбыттара.
“Yakutder” Турцияҕа Саха сирин култууратын уонна бииргэ үлэлэһиитин ассоциациятын салайааччыта Матрена Егорова бэлиэтииринэн, бу сэргэ туруоҕуттан Стамбулга ыһыаҕы ыһыы үгэскэ кубулуйбут.
— Сэргэбит баар буолан Турцияҕа олорор сахалар 2018 сылтан ыла бэйэбит түмсүү тэринэн ыһыахтыыр буолбуппут. Ыһыахпытын сылын аайы ыытабыт. Онноооҕор дьаҥ-дьаһах кэмигэр, хааччахтар арыый сымнаабыттарын кэннэ сэргэбит тула эмиэ түмсүбүппүт. Былырыын Антальяҕа улахан ыһыах буолбута. Лариса Реасовна Кулаковскайа тэрийбит уруккутунан Европа ыһыаҕа, билиҥҥинэн аан дойду ыһыаҕа диэн буолбута. Уопсайынан, тас дойдуга ыһыаҕы ыытыы наһаа улахан суолталаах. Бастатан туран, биһиги култуурабытын олохтоохторго билиһиннэрэбит. Арассыыйа элбэх норуоттааҕын, араас култууралааҕын көрдөрөр. Ыһыахпыт кэмигэр ааһан иһээччилэр, пааркаҕа сынньана кэлбит дьон түһүлгэбитигэр интэриэһиргээн киирэн көрөллөр, саха култууратын кытары билсэн, кэпсэтэн бараллар. Иккиһинэн, Турцияҕа олорор сахалар бары бииргэ түмсэр тэрээһиммит. Оҕолорбутун аҕалан билиһиннэрэбит, саха култууратыгар сыһыарабыт. Сахалыы куонкурустары тэрийэн ыытабыт, — диэн этэр кини.
Ыһыахха Стамбул куорат дьаһалтатын аатыттан Түүр омуктар дьиэлэрин салайааччыта Абдулметин Кэскин эҕэрдэлээтэ. Стамбул куораты таһынан Анталияҕа, Анкараҕа, Болгарияҕа олорор сахалар кэлэн бардылар. Саха сириттэн Амма орто оскуолатын учуутала Татьяна Петрова Турцияҕа сынньана кэлэ сылдьан тойуктаан, оһуохай этэн түһүлгэни киэргэтэн барда. Казахстантан сылдьар устудьуон Мухаммет Али Боз сахалыы хомуска оонньоон иһитиннэрдэ. Ырыаһыт Вениамин Аксенюр кэлэн эмиэ эҕэрдэлээн барда.
Ыһыахха спортивнай оонньуулары таһынан уһун суһуох, саха таҥаһын куонкурустара ыытылыннылар. Күрэхтэһии кыайыылаахтарын Турцияҕа үлэлиир бэйэ дьыалатынан дьарыктанар Наталья Хеменгюль, Марина Максимова, Екатерина Федосеева, Дмитрий Иванов, Петр Меликов, Валерий Никифоров, о.д.а. бириис туруоран эҕэрдэлээтилэр.
Ыһыах Турцияны таһынан билигин Новай Зеландияҕа, Таилаҥҥа, Японияҕа, Кытайга, Казахстаҥҥа, о.д.а. дойдуларга ыытыллар.
Дьокуускайга полиция 3 отделын дьуһуурунай чааһыгар эт-хаан эчэйиитин ылбыт Кангаласс олохтооҕо дьахтартан сайабылыанньа киирбит. Ол…
Бүтүн Арассыыйатааҕы байыаннай-тактическай «Путь воина» күрэхтэһии икки полуфиналын түмүгүнэн Саха сирин уонна Тюмень уобалаһын «ВОИН»…
Дьокуускайга 35 саастаах дьахтар үлэлиир тэрилтэтиттэн 2,7 мөлүйүөн солкуобайы уоран, холуобунай дьыала тэрилиннэ. ИДьМ Силиэстийэлиир…
Уһун, тымныы кыһыннаах, тыйыс айылҕалаах хоту дойдуга олорор буоланнар, өбүгэлэрбит барахсаттар күөх сайын уунар уйгутуттан…
Бүгүн, балаҕан ыйын 18 күнүгэр, Үөһээ Бүлүүгэ үлэ сырыытынан Ил Дархан Айсен Николаев уонна СӨ…
Алтынньы 3-5 күннэригэр Дьокуускайга "Сулус" полигоҥҥа Сэбиэскэй Сойуус Дьоруойа Федор Охлопков аатынан "Бойобуой снайпинг" дьиссипилиинэҕэ…