Сунтаар улууһун Элгээйитигэр саҥа амбулатория тутуута саҕаланна

Бүгүн, атырдьах ыйын 17 күнүгэр, Сунтаар улууһун Элгээйитигэр саҥа амбулатория дьиэтин бастакы сыбаайатын түһэрдилэр. Тутуу 2024 сыл бүтүүтэ түмүктэниэхтээх.

“Элгээйи сэлиэнньэтигэр күүтүүлээх эбийиэк дойду бэрэсидьиэнэ Владимир Путин олоххо киллэрбит “Доруобуйа харыстабыла” национальнай бырайыак доруобуйа харыстабылын бастакы сүһүөҕүн саҥардыы бырагырааматынан тутуллуоҕа. Амбулатория үлэҕэ киириитэ бастакы медико-санитарнай көмөнү оҥоруу усулуобуйатын тупсарыаҕа уонна Элгээйи сэлиэнньэтин эрэ буолбакка, Бүлүү өрүс уҥа кытылыгар сытар Сунтаар улууһун бары 11 нэһилиэгин олохтооҕо көрдөрүнэригэр тоҕоостоох буолуоҕа. Бу 800 кв.м. иэннээх улахан тутуу. Манна нэһилиэнньэ күнүһүн сытан эмтэнэр усулуобуйата эмиэ оҥоһуллуоҕа”, — диэн Ил Дархан Айсен Николаев эттэ.

Элгээйи таас амбулаториятыгар симиэнэҕэ 36 киһи сылдьарыгар суоттанар уонна 1628 киһини хааччыйыаҕа, итинтэн 353 оҕо. «Эбийиэк тутуутугар федеральнай уонна өрөспүүбүлүкэ бүддьүөтүттэн 192 мөл. солк. көрүллүбүт. Саҥа дьиэҕэ симиэнэҕэ 36 киһи сылдьар амбулатория уонна 6 миэстэлээх күнүскү стационар тэриллиэҕэ. Учаастактааҕы быраастар хосторо – терапевт уонна педиатр быраастар, ону тэҥэ, функциональнай, смотровой, процедурнай, быһыы ылар, УЗИ, стоматология хосторо, регистратура уонна лабаратыарыйа баар буолуохтара”, — диэн Элгээйи учаастактааҕы балыыһатын сэбиэдиссэйэ Светлана Конобулова кэпсиир.

Сэбиэдиссэй, Элгээйи учаастаактааҕы балыыһата улуус 1906 сыллаахха тэриллибит мэдиссиинэ биир кырдьаҕас  тэрилтэлэриттэн биирдэстэрэ буоларын ыйар. 15 куойкалаах Элгээйи балыыһата 1952 сыл алтынньы 1 күнүгэр аһыллыбыта.

Саҥа балыыһа тутулларыттан ордук кырдьаҕастар үөрэллэр. Айсен Николаев Саха сирин олохтооҕун нэһилиэнньэтин доруобуйатын харыстааһын инники күөҥҥэ турарын бэлиэтиир. Кэлиҥҥи биэс сылга доруобуйа харыстабылын 67 эбийиэгэ, ол иһигэр Перинатальнай уонна Кардиососудистай кииннэр тутулуннулар. Сотору онкология киинэ аһыллыаҕа.

Ил Дархан уонна Бырабыыталыстыба пресс-сулууспата.