Сунтаар улууһун педагогическай үлэ бэтэрээннэрин чиэстээтилэр

Олунньу 29 күнүгэр Дьокуускай куоракка олорор Сунтаар улууһун үөрэҕин бэтэрээннэрин үгэскэ кубулуйбут көрсүһүүтэ үрдүк таһымнаахтык ааста.

Бу күн 149 педагогическай үлэ бэтэрээннэрэ күндү ыалдьыт буоллулар. Тэрээһиҥҥэ улуус баһылыга Анатолий Васильевич Григорьев, Ил Түмэн дьокутааттара Афанасий Васильевич Постников, Андрей Юрьевич Николаев, өрөспүүбүлүкэҕэ биллэр педагог-салайааччылар Варвара Сергеевна Иванова-Зверева, Надежда Шиндикеевна Карамзина уо.д.а. бэйэлэрин эҕэрдэлэрин, алгыс тылларын анаатылар.

Педагогическай үлэ бэтэрээннэрэ бииргэ үлэлээбит биир идэлээхтэрин көрсөн, астына дуоһуйа кэпсэтэн, сэргэхсийэн, сынньанан бардылар. Кинилэргэ Ил Түмэн Бочуотунай грамоталара туттарылыннылар. Түмүккэ көрсүһүүнү мааны куоластарынан, ураты талааннарынан саха эстрадатын сулустара Дьүрүйээнэ, Сиэйэ уола уонна Хадаана  кэлэн киэргэттилэр. Инникитин улууска үөрэх сайдыытын туһугар, бары биир сомоҕо түмсэн, сүбэлэһэн, биир санааҕа кэлэн көрсүһүү түмүктэннэ диэн Сунтаар улууһун үөрэх управлениетын пресс-сулууспата иһитиннэрэр.