Сунтаардар «Северная Радуга» фольклор бэстибээлигэр ситиһиилэрэ

Кулун тутар 26-30 күннэригэр Санкт-Петербург куоракка «Үгэстэри харыстыыбыт» («Сохраняем традиции») «Северная Радуга» 11-с төгүлүн ыытыллар норуоттар икки ардыларынааҕы фольклор бэстибээлэ ыытылынна.

— Бэстибээлгэ Сунтаар улууһуттан хас да бөлөх баран кыттан ситиһиилэннибит. Ол курдук, «Кылыһах» фольклорнай бөлөх муҥутуур кыайыылаах  — Гран-При (сал. Александра Яковлева), «Күбэйэ» үҥкүү ансаамбыла 1 истиэпэннээх лауреат, (сал. Николай Баянаев) үрдүк ааттары ситистибит. Кэмпэндээйи нэһилиэгиттэн икки бөлөх кыттыыны ылла. «Туус Кэнэли», «Сахам алаадьыта» үҥкүү бөлөхтөрө иккиэн 2 истиэпэннээх лауреат буоллулар. Бу бэстибээлгэ дойду араас муннуктарыттан кытта кэлбиттэр, барыта 60 тахса нүөмэр көрдөрүлүннэ.
Манна даҕатан эттэххэ, бэстибээл 2018 сылтан Санкт-Петебург куораттан саҕыллан ситимин быспакка сылын аайы ыытыллар. Бырайыак ааптарынан уонна дириэктэринэн биир дойдулаахпыт Александра Васильевна Борисова буолар. Бу бэстибээл үгүс элбэх омук олорор модун Арассыыйа уонна тас дойдулар талааннаахтара мустан бэйэлэрин омуктарын үгэһин, култууратын, ырыатын-тойугун, үҥкүүтүн-битиитин билиһиннэрэр, бэйэ-бэйэни кытары билсиһэр, доҕордуу сыһыаннара үөскүүр түһүлгэтэ буолар. Кэлэр сылга бэстибээл Калининград куоракка ыытыллара биллэр, — диэн С.А. Зверев-Кыыл Уолун аатынан норуот айымньытын киинэ иһитиннэрдэ.