Сунтаартан ырыа кэһиилээх…

«Хантан сылдьаҕын?», — диэтэхтэринэ «Сунтаартан», — диэтэххэ, «Ээ, оччоҕо ырыаһыт буоллаҕыҥ дии», — диэн элбэх киһи түмүк оҥорор.

«Сунтаартан ырыа кэһиилээх…» диэн дьоро түһүлгэнэн Сунтаар — Олоҥхо дойдутуттан ырыаны таптааччылар, үҥкүүнү өрө тутааччылар куорат олохтоохторугар уонна ыалдьыттарыгар ырыа-үҥкүү дьоро киэһэтин бэлэхтээтибит.

Олунньу 16 күнүгэр «Сэргэлээх уоттара» КК киирээти кытта Сунтаартан ас арааһын дьаарбаҥката тэрилиннэ. «Татыйыына» хампаанньа үрүҥ, бурдук астара, «Тирэх» барыанньата, сирин аһа, Дьаархан сүөгэйэ, арыыта, этэ, «Үлэ киһитэ» бириэмийэ хаһаайыннара Станислав Семенов, Алексей Герасимов «Бэйэ аһа» бородууксуйалара, Кэмпэндээйи тууһа хамаҕатык атыыланнылар. Иккис мэндиэмэҥҥэ «Дьоллоох дьуохар» төрүттэнэн Лариса Иванова — Ырыа Дьаархан, Марта Николаева, Валентин Хорунов уонна «Күн оһуохайа» бырайыак эдэр кыттааччылара оһуохайы өрө туттулар.

Кэнсиэр Дьүрүйээнэ дьүрүскэн хомуһунан доҕуһуолланан аан дойду айыллыытын дьүһүйүүтэ бар дьону сахалыы турукка киллэрэн Сунтаартан ырыа кэһиилээх ылбаҕай ырыаһыттары билиһиннэрдим. Ол кэннэ Сунтаартан төрүттээх саха эстрадатын чаҕылхай сулустара Мичиллэй, Күндэл, Юана, Чаҕылхан, Сардаана Трофимова — Көмүс биир дойдулаахтарын, үөрүүлээх түһүлгэ ыалдьыттарын истиҥник эҕэрдэлээн ылбаҕай ырыаларын бэлэх ууннулар. Ону кытта улууспут үҥкүүһүт талааннаахтарын бөлөхтөрө кэнсиэрпитин киэргэттилэр: Алена Ядреева «Яданс», Зоя, Афанасий Соловьевтар «Алгыстаах доҕордоһуу», Георгий Семенов, Александра Ядреева «Күндэл» үҥкүү бөлөхтөрө. Бу күн үгүс дьон Китджа эбэтинэн Сунтаартан төрүттээҕин биллибит.

Дьэ, ол кэннэ Сунтаарбыт кэрэ куоластаахтара, бастыҥ ырыалаахтара сыанаҕа тахсан дэгэрэҥ ырыаны дэгэлдьиттилэр, сахалыы мааны куолаһы иһитиннэрдилэр. Анна Тотонова — Күн Күөрэгэйин истээри олус элбэх киһи кэлбит, кини ыллаатаҕына эмтэнэбит диэччилэр өссө үгүстэр. Лариса Иванова — Ырыа Дьаархан саха алааһын, саха айылҕатын, саха кэрэтин бу баардыы ойуулуур ырыата кэрэни сахта, Станислав Архипов — Сылгыһыт Ыстааһык ат үрдүгэр буолан мааны ырыатынан сулустарга көтүттэ, Александр Васильев — тыа хаһаайыстыбатын үлэһитэ, спортсмен бэрдэ чэпчэкитик дугунан «Оҕо саас» ырыатынан үҥкүүлүүр баҕаны күөдьүттэ, Вячеслав Тимофеев — Тырахтарыыс Уола ырыатынан элбэх көрөөччү сүрэҕин таарыйан сүгүрүйээччилэрин булла.

Бу тэрээһини өрө туппут, төрүттээбит киһинэн Дьаархантан «Одун» КК дириэктэрэ Василий Васильев — Үс Бааска буолар. Кини халыҥ хамаандатын Станислав Дмитриевы, Дмитрий Кондратьевы, Анна Николаеваны кытта бу дьоро түһүлгэни кыайа-хото туттулар.

Оттон мин бу кэрэ киэһэни иилээн-саҕалаан, түсчүттээн сулустарым туһунан элбэҕи кэпсээтим, төрөөбүт дойдум туһунан үгүһү сонуннаатым. Үөрэбин, дьоллонобун маннык улахан тэрээһиҥҥэ эрэнэн ыытааччы быһыытынан ыҥыран умнуллубат түгэни бэлэхтээбиккитигэр! Бу күн үрдүк сыанаҕа анабыл сибэкки дьөрбөтүн тутан олуһун долгуйдум! Махтал, Сунтаартан ырыа кэһиилээх өссө да кэлэ туруохпут!

Тускулаана ГОРОХОВА-КОБЕЛЬЯНОВА