Суолга олорбут киһини массыына тэпсэн, суорума суолланна

Дьокуускайдааҕы Госавтоинспекция иһитиннэрэринэн, ааспыт өрөбүллэргэ киин куоракка 12 суол саахала буолбут, онно түөрт киһи эчэйбит, биир киһи тыына быстыбыт.

Кулун тутар 22 күнүгэр 22 чаас саҕана Лермонтов уул. 49  №-дээх дьиэтин аттыгар 43 саастаах киһи массыына айанныыр суолугар олордоҕуна, 28 саастаах суоппар массыынанан тэпсибит. Ол түмүгэр бу киһини араас эчэйиилэрдээх балыыһаҕа илдьибиттэр. Онно сытан, суукка иһигэр тыына быстыбыт. Суоппар аһыы утаҕы испэтэҕэ быһаарыллыбыт.

Кулун тутар 23 күнүгэр ГАИ дьуһуурунай бөлөҕөр 12 саастаах уол оҕо суол саахалын кэмигэр араас эчэйиилэри ылбытын туһунан балыыһаттан иһитиннэрбиттэр. Бэрэбиэркэ быһаарбытынан, уол оҕо Михаил Николаев пр. 59/7Б №-дээх дьиэтин аттыгар буолбут массыыналар харсыһыыларыгар эчэйбит.

Бу күн 20:46 чаас саҕана «Умнас» суолга үс массыына харсыспыт. Саахал түмүгэр икки суоппар, биир пассажир эчэйбиттэр.