Суордаахтар окко киирдилэр

Дьааҥы Суордаах нэһилиэгин баһылыга Владимир Стручков эрэдээксийэҕэ бэртээхэй сонуну суруйан ыытта.

— Бөтүрүөп күнэ чугаһаатар чугаһаан иһэр. Онон сибээстээн, окко киирии бу ыган кэллэ. Күнү-дьылы былдьаһан, Дьааҥы улууһугар сорох нэһилиэктэр хайыы-үйэ киирэн оттуу сылдьаллар. Ол курдук, Суордаах нэһилиэгэр бастакынан Сартаҥтан төрүттээх күтүөппүт, үс уол оҕолоох ыал аҕата Афанасий Маевич окко бастакынан өрүүтүн киирэр. Кэлэр ыйга, баҕар, ардахтаах,  ыксаллаах балаһыанньа бүрүүкүөн сөп. Онон күнү-дьылы кэтэспэккэ, сир ыла турбут ордук. Үс ыанар  ынахтаах, биэс биэлээх улахан хаһаайыстыбалаах тутаах киһибит. Суордаах нэһилиэгэр былырыын уустук сайын ааһан,  90 сүөһүттэн 64 сүөһү төбө кыстаан тахсыбыта. Төрүөх үчүгэй буолан, сүөһү  ахсаана 108 буолла. Ыанар ынаҕа — 41 төбө. Билиҥҥи туругунан, сылгы  ахсаана  — 420. Быйылгы окко былааммыт — 370 туонна. Уу ылбыт буолан, ханна баҕарар от үүнүүтэ үчүгэй буолууһу.

Быйыл, дьэ, 10-ча сыллаах туруорсуубут туолла. Ойуур пуондатыттан чугастааҕы  нэһилиэк ходуһалара таҕыстылар. Саҥалыы дуогабардаһабыт, сирбит инвентаризацията саҕаланна. Онон сылгы-сүөһү иитэргэ биир сүрүн олук уурулунна, — диир баһылык Владимир Стручков.