Суорҕан анныгар саспыт ийэни туттулар

«Розыск» диэн суһал-сэрэтэр тэрээһин чэрчитинэн алименын төлөөбөккө куоппут, федеральнай ирдэбилгэ сылдьыбыт ийэни туттулар.

Бу туһунан УФССП Саха сиринээҕи пресс-сулууспата иһитиннэрэр. 36 саастаах иэстээх ийэ икки оҕолоох эбит. Суут бириистэптэрэ дьахтар баар буолуон сөп аадырыһыгар тиийбиттэрэ дьиэҕэ эр киһи баар буолан биэрбит. Кини ирдэбилгэ сылдьар дьахтары билбэтин эппит. Ол эрээри, суут бириистэптэрэ дьиэни киирэн көрбүттэр, бэрэбиэркэлээбиттэр уонна биир хараҥа хоско суорҕан анныгар саспыт дьахтары булбуттар. Иэстээх ийэни тутан силиэстийэлиир изоляторга илдьибиттэр.