Сураҕа суох сүппүт байыаннай сулууспалаахтар дьиэ кэргэттэригэр өйөбүл миэрэлэри көрөргө этии киллэрэр

Аҕа дойдуну көмүскүүр байыастар кэмитиэттэрин Саха сиринээҕи салаата, сураҕа суох сүппүт байыаннай сулууспалаахтар дьиэ кэргэттэригэр өйөбүл кэккэ миэрэлэрин көрөргө этии киллэрэр. Бу туһунан брифинг кэмигэр СӨ Аҕа дойдуну көмүскүүр байыастарын дьиэ кэргэттэрин эрэгийиэннээҕи кэмитиэтин салайааччыта Светлана Диодорова-Лаврентьева иһитиннэрдэ.

“Байыаннай эпэрээссийэ кыттыылаахтарын дьиэ кэргэттэригэр, байыаннай сулууспалаах аатын (статус) быһаарарга ирдэнэр докумуону хомуйарга улахан көмө ирдэнэр. Маны хас биирдии дьиэ кэргэн киһитэ тулуйар буолбатах. Онон антах баралларыгар арыаллыыр эбэтэр маннык арыаллааһыны миэстэтигэр тэрийэр наада, ону тэҥэ, харчынан өйөбүл көрүллэрэ наада”, — диэн салайааччы Светлана Диодорова – Лаврентьева эттэ.

Эрэгийиэннээҕи салаа чилиэннэрэ, РФ Оборуонаҕа министиэристибэтиттэн сураҕа суох сүппүт байыаннаай сулууспалаах дьиэ кэргэнин чилиэнигэр айанын төлөбүрүн төлүүллэригэр, маннык балаһыанньаҕа түбэспит дьиэ кэргэҥҥэ ыйдааҕы төлөбүр бэриллиитин кыаҕын уонна чэпчэтиилэри көрөллөрүгэр, сураҕа суох сүппүт байыаннай сулууспалаахтары суох буолбутунан билинэр бэрээдэгин судургутуталларыгар этии киллэрэр. Оччотугар сокуоҥҥа уларыйыы киирэрэ ирдэнэрин быһыытынан, ити курдук туһааннаах этиилэрин Саха сирин салалтатыгар уонна өрөспүүбүлүкэ Парламеныгар ыыппыттар.

Ил Дархан уонна Бырабыыталыстыба пресс-сулууспата.