Суукка иһигэр алта ойуур баһаарын умуруордулар

Саха сиригэр суукка иһигэр алта ойуур баһаара бохсулунна. Бу туһунан атырдьах ыйын 26 күнүгэр киэһэ ЫБММ Саха сиринээҕи кылаабынай управлениетын начаалынньыгын бастакы солбуйааччы Виталий Немцов иһитиннэрдэ.

«Суукка иһигэр 2 827 гектар иэннээх алта ойуур баһаара умуруорулунна», — диэтэ кини. Саха сиригэр 38 ойуур баһаара уонна биир ландшафтнай айылҕа баһаара баар. Баһаары умуруорууга 1012 киһи уонна 77 тиэхиньикэ үлэлээтэ. Билигин авиапатрульга сэттэ салгын суудуналар тахсыбыттара, баһаары умуруорууга МИ-8 бөртөлүөт, ону тэҥэ Бе-200 амфибия сөмөлүөтэ Мииринэй куоракка дьуһуурустубаҕа таҕыста.