Суут бириистэптэрэ байыаска квадрокоптер атыылаһан туттардылар

РФ Суут бириистэптэрин федеральнай сулууспатын Саха Өрөспүүбүлүкэт управлениета 250 тыһ.солк. DJI Mavic 3 Pro квадрокоптеры атыылаһан, РФ Оборуонатын министиэристибэтин подразделениетыгар туттарда. Бу подразделениеҕа быйылгыттан Дьокуускай куорат анал салаа суут бириистэбэ Владимир Попов сулууспалыы сылдьар.

Бойобуой соруктары ситиһиилээхтик толоруу, састаап куттала суох буолуута аныгы  тиэхиньикэттэн быһаччы тутулуктаах. Пилота суох аппарааты Владимир Поповка бэйэтигэр туттардылар. Кини бииргэ үлэлиир дьонугар өйөбүллэрин иһин махтанна, иннигэр туруоруллубут соруктары толорорго эрэннэрдэ. Көрсүһүү кэмигэр инники кирбии күннээҕи олоҕун, бойобуой доҕордоһуу уонна бэйэ-бэйэҕэ көмөлөһүү улахан суолталааҕын туһунан кэпсээтэ. Онно баар хас биирдии баҕа өттүнэн барбыт киһи — дьиҥнээх патриот буоларын  бэлиэтээтэ. Хоодуот быһыытын уонна бэйэтин харыстаммакка кыттыытын иһин Владимир Попов судаарыстыбаннай наҕараадаларга тиксибитэ: «Бойобуой килбиэнин иһин» мэтээл, «Георгий Жуков» аатынан мэтээл, «Александр Суворов» аатынан мэтээл уонна «Байыаннай дьайыы кыттыылааҕа» мэтээл. Бу уустук кэмҥэ байыаннай дьайыы зонатыгар соруктары толорор биир дойдулаахтарбыт өйөбүлгэ ордук наадыйаллар. Хас биирдии киһи кыра да кылаата Кыайыыга уопсай суолбут сорҕото буолар.