Поручитель улахан суумаҕа атын киһи кирэдьиитин төлүүр буолла

СӨ Үрдүкү суута  урбаанньыт кирэдьиитинэн поручительтан бөдөҥ кирэдьиит харчыны ирдиир туһунан Мииринэй оройуонун суутун быһаарыытын күүһүгэр хаалларда.

Суут пресс-сулууспата иһитиннэрбитинэн, 2023 сыл бэс ыйыгар урбаанньыт 2,5 мөл. солк. суумалаах кирэдьиити 44 ый болдьоххо сылга 19,5% ыстаапкалаах ылбыт. Кирэдьиит баан онлайн-сервистэрин нөҥүө оҥоһуллубут. Кирэдьиит харчытын мэктиэлиир инниттэн, поручитель дуогабара түһэрсиллибит. Ол дуогабарынан поручитель кирэдьииккэ, ол иһигэр бырыһыаннарга, ыстарааптарга уонна суут ороскуоттарыгар биир тэҥ эппиэтинэһи сүгэрэ биллэр.

2023 сыл бэс ыйыттан 2025 сыл ыам ыйыгар диэри кирэдьиит суумата төлөммөккө, болдьоҕо аһарыллыбыт, ол кэннэ баан ирдэбиллэрэ эппиэтэ суох хаалбыттар. Эбиитин бу кэмҥэ СӨ Арбитражнай суутун быһаарыытынан, кирэдьиит ылааччы моҥкуруутунан билиниллибит. Баан иэскэ киирээччигэ уонна поручительга иккиэннэригэр ирдэбил суруктары ыыталаабыт. Ол эрээри, кирэдьиит ылааччы моҥкуруутунан биллэриллибитэн сибээстээн, көрүллүбэккэ хаалбыттар. Түмүгэр суут поручитель толору кээмэйинэн биир тэҥ эппиэтинэһи сүгэрин быһаарбыт.

«Иэстээх эбээһинэһин толорботох түгэнигэр, поручитель уонна кирэдьиит ылааччы баан иннигэр биир тэҥ эппиэтинэһи сүгэллэр», — диэн РФ Гражданскай кодексатын 363-с ыстатыйатыгар олоҕуран, суут быһаарыытыгар ыйыллыбыт. Түмүгэр Мииринэй оройуонун суута поручительтан 1 751 158 солк. иэһи уонна 32 511 солк. судаарыстыбаннай пошлинаны ирдээбит. Быһаарыыны сөбүлээбэккэ, поручитель СӨ Үрдүкү Суутугар апелляцияҕа биэрбит. Онуоха суут кэллиэгийэтэ эрдэ суут быһаарыытын уларытыыта суох хаалларбыт.