СҮБЭҺИТ: Айыы алгыстаах аһа

Саха барахсан ас арааһын астаан, ыалдьыттары күндүлээн-маанылаан көрсөр үгэстээх. Биһиги өбүгэлэрбит араас аһы астаналлара биллэр. Ол курдук, үрүҥ үүт ас, сыалаах эт ас, балык, көтөртөн –сүүрэртэн ас арааһа, хааһылар, бурдук ас, үөрэ, тар утахтар араастара бааллар. Киһини аматытар, чөлүн бөҕөргөтөр, куһаҕан дьайа суох, үрүҥ тыынныыр аһы айыы аһа дииллэр. Чинчийээччилэр суруйалларынан, хас биирдии ас иччилээх. Ол иһин ыраас тыыннаах, хоммотох аһы сиэҥ диэн сүбэлииллэр.

Ис үөрэтэ

Түөрт киһиэхэ ис үөрэтин бэлэмниир буоллахха, 100 г үөс тардар, 100 г сүрэх, 100 г бүөр, 200 г харыҥ, 100 г быыһас, 100 г быар, 25 г бурдук уонна бэйэҕэ сөп буоларынан туус, 50 г тууһаммыт күөх луук наада.

Үчүгэйдик ыраастаныллыбыт, сууйуллубут ис ити көрүҥнэрин биир тэҥ гына кырбаныллар. Көстүрүүлэҕэ 2 лиитэрэ тымныы ууга бэлэмнэниллибит иһи кутан буһара ууруллар. Ис үөрэтэ оргуйан эрдэҕинэ, үөһэ тахсыбыт төбүрэҕин холбуйуллар уонна туус кутуллар. Буһарыы 1,5-2 чаас устата барар. Оргуйбут миинтэн баһан ылан, сойбутун кэннэ сэлиэй оҥоһуллар уонна оргуйа турар мииҥҥэ кутуллар. Ис үөрэтэ оргуйан бүтүүтүн саҕана бэлэмнэниллибит быары эбии кутуллар, лавровай лииһи уонна күөх луугу эбиллэр. Үөрэни итиилии тэриэлкэлэргэ кутан, остуолга аҕалыллар.

Саламаат

5 ыстакаан сүөгэйгэ 75 г бурдугу ытыйан баран, оһоххо итии турар хобордооххо буһараллар. Буһарар кэмҥэр тохтоло суох булкуйа туруохтааххын. Бу саламаат буһарыыта түргэн. Саламааты буспут хобордооҕор остуолга аҕалан ууруллар. Эбэтэр тус-туспа анал иһиттэргэ бэриллэр.

Астаах саламаат

Биир өлүүгэ: убаһа тыла – 75 г, эриэппэ луук – 10 г, тэллэй (шампиньон) – 10 г, эт бульона – 25 г, саламаат – 75 г, туус, биэрэс, күөх үүнээйи.
Убаһа тылын куһуоктарынан быһаҕыт. Луугу кыра гына кырбаталаан ыһаарылыыгыт. Сылгы тылын уонна тэллэйи туспа ыһаарылыыгыт. Маны барытын бульоннаах туой горшокка уган, үрдүгэр саламаат кутан баран, 150 кыраадыс итии духуопкаҕа буһараҕыт. Сөпкө буспут саламаат минньигэс хаҕынан бүрүллүөхтээх, кытыытынан арыыта халыйан тахсыахтаах. Остуолга уурарга буспут ас үрдүгэр күөх үүнээйини табыгынатаҕыт.

Астаабыт аскыт амтаннаах буоллун, оҥорбут аскыт тотоойу буоллун!