СҮБЭҺИТ: Масаха Мэхээстэн «Мажитель» ырысыаба

Иэдьэгэй уута (мажитель) — спортсменнарга, эттэрин-сииннэрин көрүнэр дьоҥҥо олус табыгастаах. Мажитэль — диэн нууччалыыта «Сывороточный напиток» — диэн буолар. Туһата муҥура суох элбэх, олортон сүрүннүүрэ араак, онкология ыарыыттан көмүскүүр дьоҕурдаах.

Мажитель (сывороточный напиток) диэн Францияттан төрүттээх утаҕы ханнарар утах. Сыата-арыыта суох буолан спортсменнарга, быһыыларын-таһааларын көрүнүөн, сөптөөх аһылыгы тутуһуон баҕалаах дьоҥҥо олус барсар диэн Мэхээс бэлиэтиир. Ону таһынан, «А, В1, В2, В6, В12, D, E, K» битэмииннэринэн, калий, кальций, магний, натрий, фосфор курдук минералларынан баай буолан, харахтан саҕалаан иммунитеты бөҕөргөтөргө олус туһалаах эбит. Оннооҕор искэн курдук куһаҕан ыарыыны үөскэтэр эттиктэртэн харыстыыр күүстээх. Ырысыаба олус судургу. Ол эрэн, сүөһүлээх эрэ дьоҥҥо кыаллар.

Иэдьэгэй уутугар, ол аата халбыыр үүтү аһытан онтон сылытан иэдьэгэйин арааран баран, онно тахсыбыт 1 лиитэрэ ууга (сыворотка) 1 ньыһыллыбыт апельсины, 150 гр сахары кутан үчүгэйдик булкуйабыт. Бүттэ, мажитель бэлэм буолла! Сойутан баран тымныылыы иһэр өссө үчүгэй, Далбар Хотун суруйар.