СҮБЭҺИТ: Отонтон кисиэл уонна моркуоптан хомпуот

Төрөөбүт дойдубутугар үүммүт отоннортон, оҕуруот аһыттан оҥоһуллубут буолан, кисиэл, эбэтэр, хомпуот элбэх битэмииннээх, доруобуйаҕа туһалаах утахтар.  Хойуу, ньылбырыҥнас тутуллаах, клетчаткалаах, пектиннаах буолан, киһи куртаҕар, оһоҕоһор үчүгэйдик дьайаллар.

 

Отонтон кисиэл

250 г уулаах отон, 1 ыст. саахар (бэйэҥ көрөн, кыччатыаххын сөп), 90 г хортуоппуй крахмала, 2 г лимон кислотата, 1600 г уу.

Отону ууга кутан, муорус курдук буһарабыт, ыган баран, сиидэлиибит. Муорустан кыратык ыстакааҥҥа ылан, сойутабыт уонна крахмалы булкуйабыт.

Көстүрүүлэлээх муоруска саахары уонна ыстакаантан крахмалы кыралаан кутабыт, үчүгэйдик булкуйабыт. Кисиэли өссө төгүл оргутабыт уонна тута уоттан араарабыт. Сойута, хойуннара түһэн баран, сылаастыы иһэбит.

Бу курдук ханнык баҕарар отонтон кисиэл оҥоруохха сөп.

Моркуоптаах, дьаабылыкалаах хомпуот

1 улахан моркуоп, 3 дьаабылыка, 1 ыстакаан саахар, уу.

Көстүрүүлэҕэ моркуобу, дьаабылыканы ыраастаан, кырбастаан баран, ууга уган, буһарабыт. Оргуйарын саҕана, саахар кутабыт, булкуйабыт. Дьаабылыка, моркуоп сымныахтарыгар диэри буһарабыт.

Онтон көстүрүүлэҕэ блендери уган, эрийтэрэн кэбиһэбит. Хойуу, минньигэс, битэмииннээх, судургутук оҥоһуллар хомпуот бэлэм! Пюре курдук буолан, оҕолорго туһалаах утах буолар. Сойутан баран, смузи курдук киэргэтэн биэриэххэ сөп, оннугу сөбүлүүллэр.