СҮБЭҺИТ: Татаардыы «розочка» хобуорас астыыбыт

Сабантуй федеральнай бырааһынньык тиэмэтин салҕаан, бүгүн олус табыгастаах, ураты минньигэс амтаннаах, «розочка» быһыылаах татаардыы хобуорас астыыр судургу ырысыабын кытта үллэстэбит.

Судургу ырысыабы кытта дьоҥҥутун кытта үллэстиҥ, астаан, минньигэстик аһааҥ.

Туох нааданый?

•  2,5 — 3 ыстакаан бурдук:;
•  2 устуука сымыыт;
• тиэстэҕэ 2-3 улахан ньуоска өрөһөлүү саахар;
• 2-3 улахан ньуоска сүөгэй (эбэтэр үүт, суорат);
•  быһах төбөтүгэр туус;
•  Чаайынай ньуоска аҥаара суода (уксууһунан убатабыт эбэтэр разрыхлитель 1 ч.нь.)
•  Мас арыыта;
•  Үрдүгэр кутарга саахар пуударата.

Хайдах астыыбыт?

Бастаан тиэстэни бэлэмниибит.  Дириҥ иһиккэ сымыыттары саахары уонна тууһу кытта булкуйабыт. Салгыы сүөгэй (эбэтэр үүт/суорат) уонна уксуустаах суоданы (эбэтэр разрыхлитель) кутабыт. Барытын үчүгэйдик булкуйабыт.  Сыыйа бурдук эбэбит, илиигэ сыстыбат, наһаа кытаанах буолбатах тиэстэни мэһийэбит. Тиэстэни пищевой пленканан эбэтэр сотторунан сабабыт уонна 20-30 мүнүүтэ «сынньатабыт».

Тиэстэнэн «розочка» оҥоробут. «Сынньаммыт» тиэстэни икки-үс өлүүгэ араарабыт. Биир өлүүтүн ылан, бурдуктаах остуолга 2-3 мм халыҥнаах гына чараастык тэнитэбит. 3-4 см кэтиттээх усталыы бысталыыбыт.  Хас биирдиитин 10 см уһуннаах гына быһан биэрэбит.  Ол кэннэ хаартыскаҕа курдук «розочка» быһыылаах эрийэбит.

Хобуораһы мас арыыга буһарабыт. Буспут хобуораһы кумааҕы сотторго ууран, арыытын сүүрдэбит. Сойбутун кэннэ, үрдүгэр саахар пуудуратын кутабыт.

Минньигэс «розочка» хобуорас бэлэм. Итии чэйи кытта, дьэдьэн барыанньалаах сиир олус үчүгэй.

Кыра сүбэлэр:

• Тиэстэҕэ кыратык ванилин эбэтэр лимон суогун эбиэххэ сөп, оччотугар хобуорас сыта, атын буолар.
• «Розочкалары» оҥороргор тиэстэ чараас буолуохтаах, оччоҕо хобуорас бытарыйа сылдьар буолар.