Сылаас тыыннаах ураты оскуола

Share

Ил Дархан Айсен Николаев 2020 сыллаахха быһа сибээс кэмигэр доруобуйаларынан хааччахтаах оҕолорбутугар үс саҥа таас оскуоланы тутуохпут диэн эппитэ. Онтон 2021 сыллаахха мөлтөхтүк саҥарар оҕолор өрөспүүбүлүкэтээҕи (коррекционнай) интэринээт-оскуолалара бастакы сыбаайата түспүтэ уонна бу кылгас кэм иһигэр тутуллан, дьэндэйэн таҕыста. Соторутааҕыта үөрэнээччилэргэ, учууталларга аанын үөрүүлээх быһыыга-майгыга аспыта.

Эргэ оскуола. Мөлтөхтүк саҥарар оҕолор өрөспүүбүлүкэтээҕи анал (коррекционнай) интэринээт-­оскуолалара 1964 сыллаахха тэриллибитэ. Доруобуйаларынан хааччахтаах оҕолор ыраас салгыннаах, кэрэ айылҕалаах сиргэ үөрэнниннэр диэн Покровскайдыыр суол 10 км олохтообуттара. Үйэ аҥаара оскуо­ла дьиэтэ эргэрэн, акылаата эмэҕирэн, кыһын аайы тоҥмотор, оҕолор ыалдьыбаталлар ханнык диэн толкуйга түһэллэрэ. Эргэ оскуола тус-туспа турар алын уонна үрдүкү кылаастар үөрэнэллэригэр анаан икки куор­пустаах, остолобуойдаах, интэринээттээх этэ. Ону таһынан, үлэһиттэр олорор уопсай дьиэлэрэ баар. Бу сыллар тухары оҕолор, учууталлар даҕаны төһөлөөх саҥа оскуола тутуутун туруорустулар, тоҥон-хатан төһө эрэйдэннилэр этэй, усулуобуйа мөлтөҕүттэн.

Сайаана Львова хаартыскаҕа түһэриилэрэ.

Саҥа оскуола. Бу Саха сиригэр эрэ буолбакка, Арассыыйаҕа кытары биир улахан, аныгылыы тутуулаах оскуола буолар. Оскуола-интэринээт уопсай иэнэ 5 тыһ. тахса кв.м. Оттон аҥаардас оскуолата 3 тыһ. кв.м. иэннээх. Аттыгар сылаас галереянан силбэһэр 3 этээстээх 100 миэстэлээх интэринээттээх. Манна Дьокуускай куораттан уонна өрөспүүбүлүкэ 22 улууһуттан барыта 192 оҕо үөрэнэр. Саҥа оскуола тутуллан, үөрэнэр миэстэтэ 120-ҕэ диэри улаатта.

Доруобуйаларынан хааччахтаах оҕолорго анаммыт оскуолаҕа химия, биология, география, физика уонна робототехника, логопед, психолог анал кэбиниэттэрэ бааллар. Аныгы мультимедийнай тэриллэринэн хааччыллыылаах, мастарыс­кыайдаах, успуорт саалалаах, остолобуойдаах, бибилэтиэкэлээх, аактабай, сынньанар саалалаах, онтон да атын оҕо эргиччи сайдарыгар анаммыт хостордоох, тэриллэрдээх. Интэринээтигэр быраас хоһо, стоматолог уонна процедура ылар кэбиниэттээх. Кыргыттар уонна уолаттар утуйар хосторо тус-туспа этээстэргэ бааллар.

Оскуолаҕа уонна интэринээккэ, оҕолор доруобуйаларынан хааччахтаах  буоланнар, этээстэн этээс­кэ лиип таһар. Оттон баһаарынай өттүнэн өссө биир анал лиип көрүллүбүт. Оскуола аактабай саалатыгар кэлээскэнэн сылдьар инбэлиит оҕолорго анаан анал тиһиликтээх көтөҕөр тэрил көрүллүбүт.

Оскуола тиэргэнигэр аныгылыы оҥоһуулаах, оҕо оонньууругар, сүүрэригэр-көтөрүгэр, дьарыктанарыгар аналлаах сымнаҕас сабыы­лаах уонна искусственнай газон­наах былаһааккалаах.

Анатолий Алексеевич Федоров, Өрөс­пүүбүлүкэтээҕи мөлтөхтүк саҥарар оҕолор (коррекционнай) интэринээтоскуолаларын дириэктэрэ:

– 20 сылы быһа саҥа оскуоланы туттарары туруорсубуппут. 2015 сыллаахха быра­йыактыыр-симиэтэлиир докумуон оҥоһуллан, 2021 сылтан тутуута саҕаламмыта. Кылгас кэм иһигэр тутуллан киирэн олус үөрдүбүт. Оскуолабытыгар эбии автономнай хочуолунай, түөрт оонньуур уонна успуорт былаһаакката тутулунна. Биһиги оскуолабытыгар доруобуйаларынан хааччахтаах оҕолор үөрэнэллэринэн, үөрэтии анал киэбэ оҥоһуллан, онон үлэлиибит. Ол курдук, оҕолору биир симиэнэнэн үөрэтэбит уонна дьарыктыыбыт.

Елена Павловна Антонова, бу оскуолаҕа 45 сыл үлэлээбит, алын кылаас учуутала, логопед:

– Биһиги өр кэмҥэ хаарбах дьиэлээх оскуолаҕа олорбуппут.  Кыһалҕабытын өйдөөн, маннык үчүгэй, киэҥ-куоҥ оскуоланы тутан биэрдилэр. Оҕолорбут өрөспүүбүлүкэ, дойду таһымнаах күрэхтэргэ кыттан элбэх ситиһиилээхпит, маннык үчүгэй аныгылыы оборудованиелаах, кэбиниэттэрдээх, оҕону сайыннарар усулуобу­йаҕа өссө күүскэ үөрэниэхпит, үлэлиэхпит дии саныыбын. Оҕолорбут ситиһиилэрин туһунан өссө даҕаны элбэхтик истиэххит диэн эрэнэбин.

Ньургуйаана Румянцева, оскуола технологияҕа учуутала:

– Биһиги учууталлар уонна оҕолор өр кэтэспит саҥа оскуолабыт олох кылгас кэмҥэ тутуллан, үлэҕэ киирбититтэн бары үөрэбит, долгуйабыт, астынабыт. Саҥа оскуолабыт  оҕолор олороллоругар, үөрэнэллэригэр ананан, урукку курдук таһырдьанан сылдьыбакка, барыта биир сиргэ оҥоһуллубута олус табыгас­таах. Аны аныгылыы, саҥа оборудованиенан хааччылламмыт, биһиги үлэлиирбитигэр усулуобуйа бөҕө оҥордулар.

Готовцев Матвей, оскуола 5-с кылааһын үөрэнээччитэ:

– Биһиги саҥа оскуолабыт наһаа кырасыабай, киэҥ-куоҥ, элбэх кылаастаах, аактабай саалалаах, үс этээстээх. Элбэх оҕо баар. Дьарыктанар кэбиниэттэрдээх.

Владик Афанасьев, 7-с кылаас үөрэнээччитэ:

– Саҥа оскуолабыт наһаа улахан, эргиччи үүнээйилээх, элбэх оҕолоох. Оттон урукку ос­­куолабытыгар сибэкки аҕыйах этэ. Манна туох барыта сабыс-саҥа, сып-сырдык.

Наталья Данилова, оскуола төрөппүттэрин кэмитиэтин бэрэссэдээтэлэ:

– Аан бастаан оҕобун кытары бу оскуолаҕа кэлэн бараммыт, самнархай оскуоланы көрөммүт олус хараастыбыппыт. Ол күнтэн ыла атын төрөппүттэри кытары саҥа оскуоланы туттарар туһунан боппуруоһу туруорсубуппут. Хата, түргэн баҕайытык тутан таһааран, биһиги, оҕолорбут, төрөппүттэрбит наһаа үөрдүлэр. Оҕом бүгүн саҥа оскуолаҕа кэлэн көрөн баран: «Ийээ, бу, кырдьык, биһиги оскуолабыт дуо?» – диэн ыйытар. Кырдьык, эргэ оскуоланы кытары тэҥнээтэххэ, сирдээх халлаан курдук буоллаҕа. Баҕабыт туолан, саҥа оскуолаҕа киирбиппититтэн олус үөрэбит, долгуйабыт.

Recent Posts

  • Сонуннар
  • Уопсастыба

Роспотребнадзор: ОРВИ сезона саҕаланыан иннинэ сэрэтэр дьаһаллары ылыныҥ

Роспотребнадзор тымныйыы, ОРВИ, кириип уонна коронавирус саҥа сезона саҕаланыан иннинэ илиини чаастатык суунары, дистанцияны тутуһары,…

4 минуты ago
  • Кыайыы 80 сыла
  • Сонуннар

Үчүгэйиэн, оҕо саас!

…Оҕо саас уһаабатаҕа. Ол иһин Николай Саввич күн сирин көрбүт, оҕо буолан оонньообут кэмиттэн, эппиккэ…

33 минуты ago
  • Сонуннар
  • Сүрүн

Балаҕан ыйын 1 күнүттэн устудьуоннар истипиэндьиэлэрин кээмэйэ үрдүүр

Саҥа үөрэх дьылыттан үрдүк үөрэх кыһаларыгар истипиэндьийэ 7,6 бырыһыантан итэҕэһэ суох үрдүөҕэ. Бу бүддьүөт миэстэтигэр…

1 час ago
  • Сонуннар
  • Уопсастыба

Дьокуускайга Орджоникидзе болуоссакка фонтан хапытаалынай өрөмүөнэ түмүктэннэ

Бүгүн, атырдьах ыйын 31 күнүгэр, Орджоникидзе болуоссакка фонтан хапытаалынай өрөмүөнүн кэнниттэн үлэтэ түмүктэннэ. Бэдэрээтчит фонтаны…

1 час ago
  • Сонуннар
  • Уопсастыба

БИЭТЭС БИЛЭЭХЭП: Аһыммыта буолбакка…

Истэрин истэр этим, ааҕарын ааҕар этим да, эмэн сааспар көрбөтөхпүн көрөммүн бэри диэн бэккиһээн, сөрү…

2 часа ago
  • Сонуннар
  • Уопсастыба

Күн кутталлаах чааһа Сир диэки хайыста

Күн 4197 нүөмэрдээх куттааллах чааһа Сир диэки хайыста, диэн РНА Космос чинчийиилэрин институтун (КЧИ) Күн…

2 часа ago