Сымыйа сурах тарҕанар

Хатастааҕы сибиинньэни иитэр комплекс сабыллар үһү диэн социальнай ситимнэринэн тарҕанар сурах нэһилиэнньэни долгутуон долгутар.

Буолумуна даҕаны, нэһилиэнньэни сибиинньэ этинэн хааччыйар биир улахан тэрилтэ сабылыннаҕына соччото суох быһыы-майгы тахсар.
Дьиҥинэн ыллахха, бу тэрилтэ аҥардас 2023 сылга 640 тн сибиинньэ этин оҥорон таһаарбыт. Билиҥҥи туругунан комплекска 4554 сибиинньэ баар, онтон ийэ сибиинньэтэ 318 төбө. Хаһыс да сылын бу кэмтэн саҕалаан Хатастааҕы сибиинньэ иитэр комплекс нэһилиэнньэҕэ сибиинньэ оҕотун атыылыыр. Быйыл ити үгэс быһыытынан 2000 кэриҥэ сибиинньэ оҕото атыыланыахтаах.
Кырдьык комплекс хотонноро 80-с сылларга тутуллубут буолан эргэрии барбыт. Ол курдук, тутуулар 50-70 %-ҥа тиийэ эргэрбиттэр. Бу боппуруос СӨ Ил Дархана Айсен Николаев кыттыылаах сүбэ мунньахха көтөҕүллэн, саҥа комплексы тутууга быһаарыы ылыллыбыта. Билигин «Туймаада» Агрохолдинг инженернай сулууспатынан аныгы ирдэбиллэргэ технологическай харахтеристикаларынан эппиэттиир комплекс тутууларын бырайыага оҥоһулла сылдьар. Бу бырайыак быһыытынан комплекска 10000 сибиинньэ туруохтаах, сылга 1000 тн эт оҥоһуллар кыахтанар. Онон Хатастааҕы сибиинньэ комплекса өссө улаатар уонна нэһилиэнньэ сибиинньэ этигэр наадыйыытын хааччыйар кыахтара үөскүөхтэрэ. Билигин Дьокуускай куорат дьаһалтатын кытта айылҕа харыстабылын, экология уонна санитарнай нуормалар ирдэбиллэрин барытын тутуһан сибиинньэ иитэр комплекс туруохтаах сирин быһаара сылдьаллар.

“Туймаада” Агрохолдинг пресс-сулууспата