Сүрэх-тымыр киинигэр 2 тыһыынчаттан тахса эпэрээссийэ оҥоһулунна

Ааһан эрэр сылга  Сүрэх-тымыр киинигэр 2 тыһыынчаттан тахса үрдүк технологиялаах эпэрээссийэ оҥоһулунна. Ол иһигэр 139 эпэрээссийэ —  аһаҕас сүрэххэ. Бу эрэгийиэн  биллэр ситиһиитинэн буолар.

Ураты болҕомто инфаркт ыарыытын эмтээһин эндоваскулярнай ньыматыгар ууруллар. 11 ый иһигэр кардиология хирурдара  1239 киһиэхэ коронарнай артерияҕа стент олортулар. Бу ыарыыттан  өлүүнү аҕыйатарга уонна эмтэнээччи олоҕун хаачыстыбатын тупсарарга көмөлөстө.

М.Николаев аатынан Мэдиссиинэ Национальнай киинэ-Өрөспүүбүлүкэтээҕи 1 нүөмэрдээх балыыһа иһинэн  2022 сыллаахха тутуллубут Сүрэх-тымыр киинэ Уһук Илиҥҥэ мэдиссиинэ биир саамай аныгылара. Кииҥҥэ сүрэх-тымыр ыарыыларын быһаараллар уонна эмтииллэр, ону сэргэ ыарыы сайдар кутталын сэрэтэллэр. Манна 17 структурнай подразделение, ол иһигэр кардиология — 115, неврология — 45, доруобуйаны чөлүгэр түһэрэр — 15 уонна реанимация 25 куойкалара бааллар.

Тэрилтэ үлэтин түмүгүнэн, өрөспүүбүлүкэҕэ мэдиссиинэ үрдүк технологиялаах көмөтө 2 төгүл улаатта, ТелеЭКГ, Биир кэлим ыраахтан консультациялыыр киин уо.д.а. инновационнай тэриллэр туһаныллаллар.