Сүүйүүлээх оонньууга кыайыы кэнниттэн олох туһунан

Сүүйүүлээх оонньууга кыайыы кэнниттэн олох туһунан

Ааптар:
28.01.2023, 13:23
Бөлөххө киир:

Тохсунньу 14 күнүгэр өрөспүүбүлүкэбитигэр «Өрөгөй» диэн саҥа дьыллааҕы сүүйүүлээх оонньуу ыытыллыбыта. Манна сүрүн бирииһи — 10 мөлүйүөн солкуобайы Чурапчы улууһуттан Гаврил Терентьев сүүйэн, дьол өрөгөйүн билбитэ.

Сүүйүүлээх оонньуу кыайыылааҕа тута бар дьон кэпсээнэ буола охсубута. «Баартаах киһи эбит» диэн соһуйуу-өмүрүү быыһыгар албыннааһын да баара буолуо диэн сабаҕалааһыннар ханна барыахтарай…

Маннык оонньууга сүрүн бирииһи кыайыы киһи олоҕун уларытарын дуу, уларыппатын дуу, киһиэхэ хайдах дьайарын туһунан биир сүүйүүлээх оонньуу кыайыылааҕа кэпсээтэ.

Хаҥалас улууһун Ой нэһилиэгиттэн сылдьар Нарыйа Ушницкая Уһук Илиҥҥи федеральнай университекка үөрэнэр. Кини оскуоланы бүтэрбит сайыныгар нэһилиэк ыһыаҕар Daihatsu Mira диэн массыынаны сүүйэн турардаах.

«Оонньуу сүрүн бирииһин — массыынаны кулууппут таһыгар аҕалан туруорбуттара. Бара-кэлэ бу массыынаны мин сүүйүөм диэн санаан ааһар этим», — диир Нарыйа.

Сүүйүүлээх оонньууга кыайыан иннинэ Нарыйа суоппар буолар быраабы ылбыт эбит.

«Кыайыылааҕы биллэрэр кэмнэригэр мин трибунаҕа доҕотторбун кытта олорбутум. Хас сыыппараны эттэхтэрин аайы долгуйан испитим. Бүтэһик сыыппараны эттилэр, арай, мин нүөмэрим тахсан кэллэ! Тута сыанаҕа сүүрбүтүм, ыытааччы «Кыайыылаах — Нарыйа Ушницкая!» диэн билиһиннэрин истибитим. Үөрүүлээх быһыыга-майгыга күлүүһү туттарбыттара, онон ол киэһэ дьиэбэр массыынабын ыытан барбытым», — диэн өрөгөйдөөх чааһын Нарыйа ахтар.

Нарыйа массыына сүүйбүтүн туһунан сонуннар тута социальнай ситимнэринэн тарҕана охсубуттара. Уулуссаҕа дьон эҕэрдэлиир, бириис инники дьылҕатын ыйыталаһар буолбуттара.»Оччолорго бэйэбин биллиилээх киһи курдук сананан ылбытым», — диэн Нарыйа этэр. 

Нарыйа бу бирииһи сүүйбүтүн кэнниттэн киниттэн туох даҕаны бырыһыан даҕаны, нолуок даҕаны туппатахтара.

«Маннык чэпчэкитик кэлбит мал оннук курдук  түргэнник барыаҕа, баарткын куоттарыаҕын», — диэн дьон саҥатын истэрим. Онон сайыны быһа хатааһылаан баран, массыынабын атыылыырга быһаарыммытым. Син биир атыылыахтаах этим, күһүн атын куоракка үөрэнэ барбытым», — диэн баартаах кыыс бирииһин туһунан кэпсиир.

«Арба, ол күннэргэ аҕам ат сүүрдүүтүгэр кыайан  массыынанан наҕараадаламмыта. Онон аҕыйах күн иһигэр биһиги ыал тиэргэммитигэр сабыс-саҥа  икки массыына кэлэн турунан кэбиспитэ!» — диэн Нарыйа күлэр.

Бу кыайыы кэнниттэн Нарыйа атын да оонньууларга кытта сатаабыт эбит, ол эрээри тугу даҕаны сүүйбэтэх. Билигин киниэхэ атыҥҥа табыллар, экзаменнарга, зачеттарга чэпчэки билиэттэр түбэһэллэр эбит.

«Ол сыл мин олус элбэҕи үлэлээбитим, кыһаллыбытым, сыалбын ситиспитим, дьоҥҥо көмөлөспүтүм уонна олохпор куруук махталлаахтык сыһыаннаһабын. Үтүө үтүөнү тардар дииллэр, ол иһин буолуо, дьылҕам миэхэ маннык бэлэҕи ыыттаҕа диибин. Билигин даҕаны, бу ностуруойбун илдьэ сылдьабын», — диир Нарыйа.

Василиса Прокопьева.

Нарыйа Ушницкая архыыбыттан хаартыскалар.

Бары сонуннар
Салгыы
31 марта
  • -3°C
  • Ощущается: -8°Влажность: 79% Скорость ветра: 3 м/с

Сообщить об опечатке

Текст, который будет отправлен нашим редакторам: