Таба тириититтэн аныгылыы сиэдэрэй таҥас тигиллэр да буолар эбит

Табаһыттар сүлүөттэригэр кэлбит дьон таба тириититтэн тигиллибит таҥас арааһын сонургуу көрдүлэр.

Өлөөн улууһуттан кэлбит Валентина Винокурова таба тириититтэн кэтэ сылдьар сылаас таҥаһын көрбүт эрэ киһи барыта кэрэхсээтэ.

Таба тыһыттан тигиллибит таҥаһы улууһу сирэйдиир түөлбэ-былаһаакка аайы ыстаадалар чуумнарын үлэһиттэрэ тикпит таҥастарын быыстапкаларыгар көрүөххэ уонна биирдиилээн дьон кэтэ сылдьар таҥастарын кэрэхсии  сөп.

Өймөкөөн улууһун землячествотын бэрэстэбиитэлэ Мария Максимова эбээн норуота түөлбэлээн олорор Үчүгэй нэһилиэгин иистэнньэҥнэрэ тикпит таҥастарын билиһиннэрдэ.

Кини саха атын Москваҕа тиийэ дорҕоонноохтук ааттаппыт Дугуйдан Винокуров ийэтэ, эбээн омугун төрүт култууратын педагога Ирина Винокурова бэйэтигэр тикпит көстүүмүн  көрдөрдө. Иистэнньэҥ Мария Винокурова таба бытыгыттан быысабайдаан тикпит Өймөкөөн эбээннэрин мааныга кэтэр таҥаһа дьон болҕомтотун тарта. Кини “Якутия мастеровая” өрөспүүбүлүктээҕи быыстапкаҕа 3-с миэстэни ылбыт эбит. Маны таһынан,  маастар таба туйаҕыттан муусука үнүстүрүмүөнүн оҥорбут оҥоһуктара болҕомтону эмиэ тарта.

Ити курдук, хас хардыыҥ аайы сиэдэрэй хотугулуу таҥастаах дьон кэрэ көстүүтүн көрөн,  норуот талаанын, ис кыаҕын күүһүттэн киһи эрэ сөҕөр.