Таилаҥҥа «Хаар куйаар номохторо» сахалыы киинэни көрдөрүөхтэрэ

Муус устар 25-27 күннэригэр Таилаҥҥа Баҥкок куоракка Арассыыйа киинэтин бэстибээлэ ыытыллыаҕа. Бырагыраамаҕа «Хаар куйаар номохторо» («Легенды вечных снегов») сахалыы киинэ эмиэ киллэрилиннэ.

«House Samyan» киинэ тыйаатырыгар ыытыллар тэрээһин РОСКИНО хампаанньаннан РФ Култууратын министиэристибэтин уонна Таиланд Королевствотыгар РФ посольствотын өйөөһүннэринэн тэриллэр. Көрөөччүлэри киинэ араас жанрдара күүтэллэр: остуоруйаттан саҕалаан драмаҕа тиийэ. Бэстибээл бырагырааматыгар Сергей Урсуляк «Праведник», Алексей Романов «Хаар куйаар номохторо», Илья Учитель «Летучий корабль», Илья Михеев «110», Влада Краснослободцева уонна Ася Олешкевич«Лапин» уус-уран киинэлэрэ киирдилэр.

«Арассыыйаны уонна Таиланы кытта дипломатическай бииргэ үлэлээһиннэр 125-тэн тахса сыл буолла. Муус устар саҥатыгар биһиги дойдубут култууратын уонна туризмын атастаһыытын сыла түмүктэннэ, оттон бэстибээл Таилаҥҥа бииргэ үлэлээһини бөҕөргөтүүгэ өссө биир хардыынан буолуоҕа. РОСКИНО тэрийбит бэстибээлэ номнуо үһүс төгүлүн ыытыллар уонна мэлдьи сэҥээриини ылар. Биһиги киинэлэрбит көмөлөрүнэн Таиланд көрөөчччүлэрэ дойду баай култууратын, араас историческай түгэннэрин, ол иһигэр Аҕа дойду Улуу сэриитин туһунан элбэҕи билиэхтэрэ диэн эрэнэбит», — диэн бэлиэтээтэ РФ Култууратын миниистирэ Ольга Любимова.