Таксист массыынатын түннүгүнэн куотан быыһаммыт

ИДьМ Дьокуускайдааҕы 3-с №-дээх полиция салаатыгар улуус уонна куорат икки ардыгар сүүрэр таксыы суоппарыттан үҥсүү киирбит.

Таксист массыынатын уорбуттарын туһунан үҥсүбүт. Суһал-көрдүүр  үлэ түмүгүнэн, полиция үлэһиттэрэ  эрдэ уорууга түбэһэн сууттана сылдьыбыт 32 уонна 34 саастаах  эр дьону  туппуттар.

Эмсэҕэлээччи  Дьокуускайга  түүҥҥү кулуупка сынньанарга быһаарыммыт. Кини онно уорбаланааччылары кытта билсибит. Кэпсэтии кэмигэр бу дьон кинилэри өрүс пуордугар илдьэргэ көрдөспүттэр. Айаннаан иһэн саҥа доҕотторуттан биирдэстэрэ суоппары кытта кыыһырсан барбыт. Ити кэннэ   суоппарга саба түспүттэр. Иккис уорбаланааччы суоппартан уруулу былдьаан,   айанныы турбут.  Суоппар нэһиилэ массыына түннүгүнэн ыстанан куоппут.

Уорбаланааччылар массыынаны Короленко уулуссаҕа бырахпыттар уонна саспыттар.

РФ Холуобунай кодексатын 166 ыст. 2 ч. «Неправомерное завладение автомобилем или иным транспортным средством без цели хищения» диэнинэн холуобунай дьыала тэриллибит.