Социальнай ситимнэринэн тарҕаммыт видеоҕа икки оҕолор буолаллара билиннэ

Бу күннэргэ социальнай ситимнэринэн оҕотугар хаһыытыыр, охсуох буолан суоһурҕанар ийэ видеота киэҥник тарҕанан элбэх дьон-сэргэни аймаабыта. Үөһээ Бүлүү улууһун ИДьМ сулууспатын отделын ПДН үлэһиттэрэ видеоҕа уһуллубут иирсээн икки сокуоннай саастарын ситэ илик оҕолор ардыгар тахсыбытын быһаардылар.

ПДН иниспиэктэрэ ыыппыт бэрэбиэркэтин түмүгүнэн, сокуоннай саастарын ситэ илик кыргыттар сэтинньи 25 күнүгэр киэһэ 17:00 чаас саҕана оскуолаттан төннөн испиттэр. Бастакы кылаас үөрэнээччитэ 15 саастаах кыыстан мороженай атыылаһарга көрдөспүт уонна аккаас ылан эдьиийигэр хаһыытаабыт, ытаабыт.

Кыргыттар ийэлэрэ Дьокуускайга үрдүк үөрэх кыһатыгар кэтэхтэн үөрэххэ сессиятыгар үөрэнэ сылдьар, онон оҕолору эбэлэрэ көрөр эбит. Сокуоннай саастарын ситэ илик оҕолору кытта профилактическай кэпсэтии ыытылынна.

Сэтинньи 25 күнүгэр устубут видео ааптара полицияҕа видеону көрдөрбөккө эрэ социальнай ситимнэринэн тарҕаппыт. Туох эмит түбэлтэ туоһута буолар буоллаххытына, бастатан туран, полицияҕа тыллыыргытыгар ыҥыраллар диэн ИДьМ пресс- сулууспата суруйар.