Таттина Прокопьева: «Быыбарга кыттыы үрдүк көрдөрүүлээх буолуоҕар эрэнэбин»

Дьокуускай куорат Smart-бибилэтиэкэтин дьиэтигэр 804 №-дээх быыбардыыр учаастак баар. Сыл аайы бу учаастак ойуутунан-бичигинэн, киэргэтиитинэн киһи сүргэтин көтөҕөр, хараҕы үөрдэр.

804 №-дээх быыбардыыр учаастакка сылдьан үлэ хайдах саҕаламмытын билистибит. Быыбардыыр учаастак бэрэссэдээтэлэ Таттина Прокопьева маннык кэпсиир:

— Бүгүн биһиэхэ быыбар бастакы күнүн куоластааһына ирдэбил быһыытынан, сарсыарда 8:00 ч. саҕаланна. Биһиги учаастакпытыгар испииһэк быһыытынан 1800 быыбардааччылаахпыт. Ол иһигэр ханна тиийбит сирдэринэн куоластааччылартан 378 сайабылыанньа киирбитэ. Сарсыарда 10:00 ч. туругунан 245 киһи кэлэн куоластаата. Онон бу үс күҥҥэ өссө кэлэн быыбардыахтара диэн эрэнэбин.

Быыбар аайы аан бастаан куоластааччыны бэлиэтиир, өйдөбүнньүк бэлэх туттарар үгэстээхпит. Сокуоннай сааһын саҥа сиппит оҕо улахан олоххо аан бастакы боччумнаах хардыыта буолар, онон өр кэмҥэ өйдөөн хаалыаҕа диэн эрэнэбит. Ол эрээри билигин аан бастаан куоластааччылар кэлэ иликтэр, күн устата кэлиэхтэрэ дии саныыбын.

Биһиги 804 №-дээх быыбардыыр учаастакпытыгар биир бастакынан сахалыы таҥаһын кэтэн, СӨ норуодунай артыыһа Владимир Заболоцкай куоластаата. Быыбардыыр учаастак хамыыһыйатын чилиэннэрэ кинини кытары хаартыскаҕа түстүбүт.