Татьяна Олесова: «Эбэлэр махталлара алгыс кэриэтэ»

Ньурба улууһун бэтэрээннэрин Сэбиэттэрин бэрэссэдээтэлэ Татьяна Прокопьевна Олесова эбэлэр махталлара бэйэтэ алгыс кэриэтэ буоларын этэр.

«Сарсыарда араадьыйанан Ньурба улууһун баһылыга Алексей Иннокентьев, Сүлэ нэһилиэгин баһылыга Дмитрий Иванову, Октябрьскай нэһилиэк дьаһалтатыттан Василий Федоровы кытта бу күннэргэ Запорожьеҕа уонна Донецкай уобаласка байыаннай эпэрээссийэҕэ сылдьар Ньурбаттан төрүттээх уолаттары көрсүбүттэрин, Ньурбаттан туонна кэриҥэ таһаҕаһы тиэрдибиттэрин туһунан кэпсиирин иһиттим. Онон оҕобун көрбүт курдук сананан олоробун. Баһылыкка ыраах айаҥҥа баран оҕолорбутун көрсөн кэпсэтэн кэлбитигэр улахан махталбын этэбин”, — диэн эбэлэр махтаммыт суруктарыттан хаһыат саайтыгар үллэһиннэ.

— Ньурба улууһун бэтэрээннэрин Сэбиэттэрин бэрэссэдээтэлин быһыытынан аҕам дьону кытта куруук алтыһабын. Миэхэ төлөпүөммэр Ньурбаттан төрүттээх байыаннай эпэрээссийэҕэ сылдьар сиэннэрдээх эбэлэр суруйан санааларын үллэстэллэр. Улууспут баһылыга Алексей Иннокентьев улуустан үс буолан, Запорожьеҕа уонна Донецкай уобаласка байыаннай эпэрээссийэҕэ сылдьар Ньурбаттан төрүттээх уолаттарбытын көрсүбүтүн, Ньурбаттан туонна кэриҥэ таһаҕаһы тиэрдибиттэрин туһунан туһунан истэннэр, бэйэлэрэ тиийэн көрсүбүт саҕа сананан, үөрбүттэрэ.
Ол туһунан кинилэр бу курдук суруйаллар: “Уолум улууһун баһылыга кинилэри көрсө байыаннай эпэрээссийэ буола турар сиригэр кэлэн барбытын олус астынар, өссө оскуолаҕа сылдьан киниттэн бириис ылбытын кытта саныыр”, «Христофор улууһун баһылыга бэйэтинэн кэлэн барбытын таҥара көстөн ааспытын курдук санаабыт этэ, өссө биһиги эрэ баһылыкпыт кэлэн көрсөн барда диэн киэн туттубут”, “Оҕолорбут барахсаттарга тиийэ сылдьыбытын иһин улууһум баһылыгын Алексей Михайловиһы көрсөн махтаныахпын, баһыыбалыахпын баҕарабын да, ким миигин онно ыраах дэриэбинэттэн тиэйэн киллэриэй, кырдьаҕас эмээхсини”, “Бэрт уһуннук сибээскэ тахсыбакка, баһыылка ылбакка сылдьыбыт, сорохторо аармыйаттан хантараагынан быһа барбыттара балтараа эҥин сыл буолбут оҕолорго тиийэ сылдьыыта чахчы да наһаа үөрүүлээх, онтон саамай үөрдүм, бэл диэтэр, бэйэм барса сылдьыбыт саҕа сананным, оҕобут котоку наһаа үөрээхтээбит, астыммыт, баһылыга тиийэн көрсүбүтүгэр”.
Дьэ, бу курдук суруйаллар оҕолорун туһугар долгуйаннар — эбэлэр барахсаттар. Онон дойдуларыттан баран көрсүһүү, сахаларын аһыттан илдьэн биэрии, сонуннары тиэрдии на7аа  наадалаах.