Төҥүлү нэһилиэгэ 7 мөлүйүөн солкуобайынан бириэмийэлэннэ

«Куорат тутуутун бэлиитикэтэ, нэһилиэнньэ олоҕор-дьаһаҕар табыгастаах эйгэни хааччыйыы уонна олорор дьиэ-хомунаалынай хаһаайыстыбаны сайыннарыы» номинацияҕа «Бастыҥ муниципальнай практика – 2025» Бүтүн Арассыыйатааҕы куонкуруска Мэҥэ Хаҥалас улууһун Төҥүлү нэһилиэгэ үһүс миэстэни ылла. Муниципалитет куонкурус түмүгүнэн 7 мөлүйүөн солкуобай суумалаах харчынан бириэмийэлэннэ.

«Бастыҥ муниципальнай практика – 2025» Бүтүн Арассыыйатааҕы куонкурус кыайыылаах муниципальнай тэриллиилэригэр бириэмийэлэр федеральнай бүдьүөттэн РФ субъектарын бүддьүөттэригэр, РФ «Федеративнай сыһыаннаһыыны сайыннарыы уонна эрэгийиэннээҕи уонна муниципальнай үптэри дьиҥнээхтик уонна эппиэтинэстээхтик салайыыга усулуобуйалары тэрийии» диэн судаарыстыбаннай бырагырааматын «РФ субъектарын уонна муниципальнай тэриллиилэри РФ субъектарын толоруулаах былаас уорганнарын үлэтин үтүөтүн уонна олохтоох бэйэни салайыныы уорганнарын үлэтин сыаналааһын түмүгүнэн көҕүлээһин» диэн тэрээһиннэри олоххо киллэрии чэрчитинэн бэриллэллэр.
Төҥүлү нэһилиэгэ куонкуруска «Дэгэт Аартыга» искибиэри оҥоруу бырайыагынан кыттыбыта. Бастаан бу бырайыак Аҕа дойду Улуу сэриитин сылларыгар сэриилэспит уонна үлэлээбит саллааттарга, үлэһиттэргэ анаммыта, ол гынан баран, бырайыак кэҥэтиллэн, Төҥүлү толору устуоруйатын көрдөрөр.

«Дэгэт Аартыга» искибиэргэ бетонтан оҥоһуллубут скульптуралар, норуот маастардарын, тимири уустар, маһынан маастардар айымньылара мунньуллубуттар.